سەرۆکی حکوومەتی هەرێمی کوردستان گەیشتە واشنتن
ھەولێر-KDP.info- سەرۆکی حکوومەتی ھەرێمی کوردستان، بە سەردانێکی فەرمی گەیشتە واشنتن و، بڕیارە زنجیرەیەک دیدار و کۆبوونەوەی لەگەڵ بەرپرسانی باڵای ئەمەریکا و کۆنگرێس ئەنجام بدات.
ئەمڕۆ شەممە ١٧ـی ئایاری ٢٠٢٥، مەسروور بارزانی، سەرۆکی حکوومەتی ھەرێمی کوردستان، بە سەردانێکی فەرمی و لەسەر بانگھێشتی حکوومەتی ئەمەریکا، بە سەرۆکایەتی شاندێکی باڵا گەیشتە واشنتن.
لەم سەردانەدا بڕیارە سەرۆکی حکوومەت، زنجیرەیەک دیدار و کۆبوونەوە لەگەڵ بەرپرسانی باڵای حکوومەتی ئەمەریکا و کۆنگرێس ئەنجام بدات. ھەروەھا لەگەڵ وەبەرھێنەران و خاوەنکارانی ئەمەریکی گفتوگۆ لەبارەی پەرەپێدانی پەیوەندیی ئابووری و بازرگانی دەکات.
تەوەرێکی سەرەکی گفتوگۆکانی سەرۆکی حکوومەت لەگەڵ بەرپرسانی ئەمەریکا، تایبەتە بە پتەوکردن و پەرەپێدانی زیاتری پەیوەندیی و ھاوبەشی ستراتیژی نێوان ھەرێمی کوردستان و ئەمەریکا و تاوتوێکردنی دوایین گۆڕانکاری و پێشھاتەکانی دۆخی گشتیی عێراق و ناوچەکە.
مەسروور بارزانی، ھەروەھا بەشداریی لە گفتوگۆیەکی تایبەتی کۆڕبەندی وزە لە واشنتن دەکات بە ناونیشانی "داھاتووی وزە لە ھەرێمی کوردستان". کە ڕوانین و دیدگای ھەرێمی کوردستان بۆ پەرەپێدانی کەرتی وزە دەخاتە ڕوو و و تیشک دەخاتە سەر دەرفەتەکانی وەبەرھێنان لەم کەرتەدا.
