سەرۆکی ھەرێمی کوردستان پیرۆزبایى له بنكه‌ى لالش ده‌كات
ھەولێر-KDP.info- ئەڤرۆ دووشەمبێ ١٢-٥-٢٠٢٥، نێچیرڤان بارزانی، سەرۆکێ ھەرێما کوردستانێ، ٣٢ ساڵیا دامەزراندنا بنگەھێ لالش یێ ڕەوشەنبیری و جڤاکی پیرۆز دکەت.
دەقا پەیاما سەرۆکێ ھەرێما کوردستانێ:
سالڤەگەرا (٣٢)ێ یا ئاڤاکرنا بنگەھێ لالش یێ ڕەوشەنبیری، ب گەرمی ل ھەمی خوشک و برایێن ئێزدی پیرۆز دکەم. کار و خزمەت و بەرھەمێن بنگەھێ لالش، ب ڕێز و پێزانین دنرخینم. دەستخۆشیێ ل تیما ڕێڤەبەری و ھەمی کارمەندێن بنگەھی دکەم. ھیڤیا سەرکەفتنا بەردەوام بۆ وان دخازم.
د ڤێ بیرھاتنێدا دیسا تەکەزێ لسەر ھەمی پشتەڤانی یا خۆ بۆ کار و چالاکی یێن بنگەھێ لالش دکەم. وەک ھەردەم دێ ھاریکار بم دا یێ بەردەوام بیت و وەک کانییەکا زەلال کو دھوڕتە د ڕووبارێ ڕەوشەنبیرییا کوردیدا، خزمەتەکا باشتر یا ڕەوشەنبیریا کوردی و بتایبەتی ئێزدیاتیێ بکەت.
ھەر دڤێ ھەلکەفتنێدا خوشک و برایێن خۆ یێن ئێزدی و ھەمی پێکھاتێن کوردستانێ ژ ھەر ئۆل و نەتەوەیەکێ بن، پشتڕاست دکەم کو ھەردەم دێ پشتەڤان و پارێرڤانێن مافێن وان بم و کوردستان بۆ مە ھەمیا دێ ھەر مینیت وەلاتێ پڕڕەنگی و ھەڤقەبوولکرنێ و پێکڤەژیانا ئاشتیانە.
نێچیرڤان بارزانی
سەرۆکێ ھەرێما کوردستانێ
٢٠٢٥/٥/١٢
