په‌یامى سەرۆکی ھەرێمی کوردستان له یادى شه‌هیدانى قه‌ڵادزێدا
ھەولێر-KDP.info- سەرۆکی ھەرێمی کوردستان لە ٥١مین ساڵیادی بۆمبارانکردنی شاری قەڵادزێ، پەیامێکی بڵاوکردەوە و تێیدا ھاتووە، ئەمڕۆ یادی خەمناکی ساڵیادی بۆمبارانکردنی زانکۆی سلێمانی و شاری قەڵادزێ دەکەینەوە کە لە تاوانێکی دڕندانەی ڕژێمی پێشووی عێراق و لە ھەوڵێکی بێھودەدا بۆ شکاندنی ئیرادەی گەلی کوردستان، دەیان قوتابی و مامۆستا و ھاووڵاتی شەھید بوون.
دەقی پەیامی نێچیرڤان بارزانی:
ئەمڕۆ یادی خەمناکی ساڵیادی بۆردومانکردنی زانکۆی سلێمانی و شاری قەڵادزێ دەکەینەوە کە ٢٤ی نیسانی ١٩٧٤ لە تاوانێکی دڕندانەی ڕژێمی پێشووی عێراق و لە ھەوڵێکی بێھودەدا بۆ شکاندنی ئیرادەی گەلی کوردستان و بزووتنەوە ڕزگاریخوازییەکەی، دەیان قوتابی و مامۆستا و ھاووڵاتی شەھید بوون.
لەم یادەدا، بە ڕێزەوە یادی شەھیدانی جوانەمەرگی زانکۆ دەکەینەوە و سەری ڕێز و نەوازش لەبەردەم گیانی پاکیاندا دادەنەوێنین. ئەم تاوانە سامناکە، لاپەڕەیەکی تری ئازاربەخشی مێژووی کوردستان بوو، بەڵام نەیتوانی ئیرادەی گەلەکەمان لاواز بکات، بەڵکوو گوڕوتینی بۆ بەردەوامیی خەبات و تێکۆشان لەپێناو ئازادیدا، پتەوتر کرد.
لەم بۆنەیەدا، پشتگیریی تەواومان بۆ خزمەتکردنی زیاتری ناوچەی پشدەر و قەڵادزێ نوێ دەکەینەوە کە ھەمیشە ھێمای خەباتی نیشتمانی بوون و بۆ بەرگریکردن لە کوردستان، قوربانیی گەورەیان داوە. بەرپرسیاریەتیی ھەموومانە بە کارکردن بۆ داھاتوویەکی باشتر بۆ خەڵکی ئەوێ و کوردستان بەگشتی، ڕێز لە خەبات و قوربانیدانیان بگرین.
سڵاو لە گیانی پاکی شەھیدانی زانکۆی سلێمانی و قەڵادزێ و تەواوی شەھیدانی کوردستان، یادیان بە خێر.
نێچیرڤان بارزانی
سەرۆکی ھەرێمی کوردستان
٢٠٢٥/٤/٢٤
