ژبەر ئارامییا کوردستانێ، زوربەهییا مەسیحیێن عیراقێ ل هەرێمێ دژین
دھۆک-KDP.info- القیامە، هەستان یان رابوون، ئەو جەژنا هەرە مەزنا کرستیانان، ئەڤرۆ، کرستیانێن هەرێمێ ژی ئەڤ جەژنە گێرا، و ئەو دبێژن، کوردستان ئارامترین جهێ کرستیانانە ل عیراقێ.
ژبۆ ڤێ هەلکەفتێ مالپەرێ فەرمی یێ پارتی دیموکراتی کوردستان چاڤپێکەفتنەک دگەل د.جیمس حسدو هیدو، ئەندامێ پەرلەمانێ کوردستانێ ل سەر کوتایێ کریستیانان ل دهوکێ ئەنجامدا، و ئەوی ل دەسپێکا چاڤپێکەفتنێ گرنژی و گوت: "هەر ژناسناڤێ دهۆکێ (دهۆکا رەنگین) دیارە کو دهۆک وەکو تابلویەک مەزن و جوانە و ب جوداهی و تێکەلییا مرۆڤان رەنگین بوویە".
د.جێمس: ئەڤ جەژنە ل هەمی کرستیانان پیروزبیت، تایبەت کرستیانێن دهۆکێ چونکە پترییا کرستیانێن هەرێما کوردستانێ و عیراقێ ل پارێزگەها دهۆکێ و ئیدارا سەربەخۆ یا زاخۆ دژین، و ئەڤ چەندە وێنەیەک جودا ددەتە ڤی باژێری، کو ئاین و پێکهاتە و نەتەوە و هزر و تێگەهشتنێن جودا لێ هەنە و هەمی ئێکتر قەبول دکەن.
ل گورەی وان ئامارێن کەنیسەیان ل پارێزگەها دهۆکێ و ئیدارا سەربەخۆ یا زاخۆ، دنوکە دا پتر ژ٥٠٠٠ خێزانێن کرستیانان دژین، ژبلی وان هزارەهان کرستیانان کوچکرییە بۆ ژدەرڤەی وەڵاتی تایبەت پشتی ساڵا ٢٠٠٣ێ و هەلبەت پشتی ٢٠١٤ێ ژی و ئەگەر ژی سیاسی بوون، ژبەر کو پشتی شکەستنا رژێما بەعس(نظام البعث) ل عیراقێ ساڵا ٢٠٠٣ێ ئاریشێن ناکوکیێ ل عیراقێ پەیدابوون و کرستیانان پەنا برە وەڵاتێن ژدەرڤە، پاشان ل ساڵا ٢٠١٤ێ ژبەر داگیرکرنا رێکخراوا داعش یا تیرورستی بۆ چەندین دەڤەرێن عیراقێ ژوانا دەڤەرێن کرستیانان، ئەو کرستیانێن مایی ژی هەست ب نە ئارامی و ژدەستدانا ئازادیێ کرن و ل وێرێ ژی ژمارەیەک مەزن ژوان کوچ کر.
د.جێمس دناڤا گوتنێن خۆدا گوت: زوربەهییا مەسیحیێن عیراقێ ل هەرێما کوردستانێ دژین و چەندین ساڵە ب هەمی جەژن و هەلکەفتێن خۆ رادبن و دیارە کو چەند موسلمان کەیف خۆشن و بەژداری گەلەک جەژن و رێوەرسمێن مە دبن و ئەڤە وێنەیەک جوان یێ پێکڤە ژیانێ ل هەرێما کوردستانێ نیشا ددەت،
هەروەسا گوت: دبیت کەسێن تێکدەر هەبن و حەز دکەن ڤی وێنەی بەروڤاژی دیاربکەن لێ ب تێکدەرییان کارتێکرن ل مە نابیت و بەردەوام بەرەف کوردستانەکا ئاڤا دچین و کرستیان ب ڤیان و ئاشتییا خۆ بەرنیاسن و ئەڤە ناما مەیە بۆ هەمی جیهانێ.
جەژنا القیامە ئانکو هەستان یان رابوون، دباوەرییا کرستیانان دا دڤێ رۆژێ دا رابوونا پێغەمبەرێ وان (عیسا)یە ژگوری بۆ بەرەف ئاسمانان، و ساڵانە ل ئێکشەمبەکا هەیڤا چوار ئەڤ جەژنە دهێتە گێران، و بەرییا هینگێ ب ٤٩ رۆژان ئەو رۆژیان دگرن و خۆ ژهەمی بەرهەمێن گیانەوەران و گوشت و هێک و شیر و بەرهەمێن شیری دویر دکەن و ل رۆژا ٥٠ دبیتە جەژن تێدا هێکان دخەملینن و پێشکێش دکەن و ژەمێ فراڤینێ ژی پترییا وان خوارنا پاچێ چێدکەن وەک خوارنەکا کوردی یا پر ژکانزا و ڤایتامینان.
د.جێمس ل دویماهیێ خواست: دخوازین ئاریشێن ئابوری یێن دناڤ بەرا عیراقێ و کوردستانێ چارە ببن چونکە رەوشا ئابوری یا خراب ژی ئەگەرەکە ژبۆ کوچکرنا کرستیانان، هەروەسا وەکو هەر تاکەکێ کوردستانی هیڤییا مە ئەوە وەلات ئارام بمینیت و ب ئاشتیانە بژین و هزرێن توند قەبول نەکەین و ئەم ڤێ چەندێ ژی نیشا زاروکێن خۆ بدەین دا نفشەکێ تێگەهشتی و ئاڤا مەزن بکەین.
سەجا شێرزاد-دهۆک
