سەرۆکێ بنگەهێ لالش بۆ KDP: ئەڤە وەلاتێ مەیە و هەست ب غەریبیێ ناکەین

شنگال-KDP.info- ئێزدی، ئەو پێکهاتەیا کوردێن رەسەن، کو ب درێژییا مێژویێ تووشی چەندین کارەساتێن مرۆڤی و مال وێرانکرنێ بووینە، ئەڤرۆ، پتری ٣٠٠ هزار کەسان ژوان، ب تنێ ل کوردستان دژین، ژبلی کو هزارەهان ژوان ژی ل وەلاتێن غەریبیێ دەربەدەر بووینە.

ب هەلکەفتا دەسپێکرنا سەر ساڵا نوی یا ئێزدیان، کو بەرییا چەند رۆژان و ساڵانە دچوار شەمبا ئێکێ دا ژڤێ هەیڤێ ئەو جەژنێ دگێرن، و دباوەرییا وان دا ل ڤێ رۆژێ گەردوون دروستبوویە، ژلەوما ژی ئەو ٣٦٥ فەتیلان ل پەرستگەها لالش هەڵ دکەن و هێکان دخەملینن و پێشکێشی مێهڤانان دکەن و پەرستنا خودایی دکەن ل دویف سروشتێ خۆ و ئاینێ خۆ، کو دراستی دا ژی، ناڤێ وان ئێزدی-ئەزدایی ژڤێ چەندێ هاتییە کو ئەو ب تنێ خودا پەرست و تاک پەرستن.

ب ڤێ هەلکەفتێ مالپەرێ فەرمی یێ پارتی دیموکراتی کوردستان چاڤپێکەفتنەک دگەل سەعید جردو سەرۆکێ بنگەهێ لالش ئەنجامدا و ژلایێ خۆڤە ژی جەژن لێ پیرۆزکر: "جەژنێن مە ئێزدییان بۆ مە گەلەک گرنگن ژبەر پاراستنا کەلتورێ باب و کالێن مە، کو ب هزارەهان ساڵان بەرگیری ژناسنامە و کەلتور و فەلسەفا خۆ یا ئاینی کرییە، هەر وەسا خۆ ل بەرامبەر هەمی کارەسات و مال وێرانییان ژی راگرتینە، بۆ هندێ ڤی کەلتورێ دێرین ب پارێزن و نوکە ژی ئەم نەڤیێن وان ب ئازادانە و دناڤ کوردستانەکا ئازاد دا رێورەسمێن جەژنێن خۆ دگێرین."

ل ساڵا ٢٠١٤ێ ل دەمێ داگیرکرنا رێکخراوا داعش یا تیرۆرستی بۆ دەڤەرێن نەینەوا و دەوروبەران، کو زەرەرمەندێ سەرەکی تێدا ئێزدیێن دەڤەرا شنگالێ بوون، هزارەهان کوردێن ئێزدی دەربەدەری هەرێما کوردستانێ-پارێزگەها دهۆکێ بوون، و هزارەهان ژوان ژی ژشەرێ داعشێ قورتال نەبوون، بەشەک ژوان بوونە ئێقسیرێ دەستێن داعش، و بەشەک ژوان ژی گیانێ خۆ ژدەست دان، و دەربارەی ئێزدیێن دنوکە دا ئاگنجی ل دهۆکێ سەعید جردو دبێژیت:

"ل ژیانا ئاوارەیی زەحمەتی هەنە تایبەت ژبۆ خەلکێ شنگالێ، لێ ئەم دبینین ئەڤە وەلاتێ مەیە و هەست ب غەریبیێ ناکەین و ب سەرفرازانە و برایانە هەمی پێکهاتەیێن ڤی وەلاتی پێکڤە دژین و سەرەدەریێ دگەل ئێک دکەن و رێزێ ل ئێک دگرن و ئێکتر قەبول دکەن و ل خۆشی و نەخۆشییا ل پشتا ئێکن، و ئەڤە جهێ دلخۆشییا مەیە لێ ب راستی ژی ئەڤ چەندە نە دوورە ژ فەلسەفا بارزانی کو هەر ژ سالێن ٦٠-شێستان و هەتا نوکە دووپات دکەن، ئەڤ وەڵاتە وەڵاتێ هەمییانە و هەر کیانەک و کەسەک یێ ئازادە چەوا خۆ پێناسە بکەت و ب رێورەسم و جەژن و داب و نەریتێن خۆ راببیت و بگێریت، و رۆژ بۆ رۆژێ ئەڤ فەلسەفا سەرکردایەتییا مە گەشتر دبیت ب تایبەتی کو مەرجەعێ مە سەرۆک مەسعود بارزانی هەر تشتەکێ دبەرژەوەندییا ئاین و نیشتیمان پەروەری و پێکهاتەیان دابیت تەکەزێ لێ دکەت کو دەستوور و یاسایێن بۆ هەین بهێنە پاراستن"

ل دویف وان ئامارێن فەرمی یێن پیر دەیان پیر جەعفەر رێڤەبەرێ کۆچ و کۆچبەران و بەرسڤدانا قەیرانا ل یێن پارێزگەها دهۆکێ تایبەت بۆ مالپەرێ فەرمی یێ پارتی دیارکرین: دنوکە دا نێزیک ١٥٠ هزار کەسان ژکوردێن ئێزدی ل پارێزگەها دهۆکێ دژین، و پتری ٦٠٠ هزار ئێزدییان ژی ل عیراقێ دژین، هەروەسا ١٥ کەمپێن ئێزدییان ل پارێزگەها دهۆکێ و ئیدارا سەربەخۆ یا زاخۆ هەنە، تێدا نێزیک ٢٠ هزار و ٨٠٠ خێزانان دژین کو دبنە نێزیک ١١٠ هزار کەسان، و ژدەرڤەی وان ١٥ کەمپان ژی ٣٥ هزار خێزان ئاگنجینە کو دبنە نێزیک ١٨٥ هزار کەسان، و هۆسا نێزیک ٣٠٠ هزار کەسان ژخەلکێ شنگالێ ل کەمپان و ژدەرڤەی کەمپان ل پارێزگەها دهۆکێ هەنە.

ل دویماهییا چاڤپێکەفتنێ، سەعید جردو وەک سەرۆکێ بنگەهێ لالش ل دهۆکێ هیڤیێن ئێزدییان بۆ مالپەری دیاردکەت و دبێژیت: "هەلبەت هیڤیێن مە ئێزدییان ئەون ئاشتی ل هەمی دەڤەرێن مە بهێتە دی، و دویربین ژشەر و هەڤرکیێن حزبێن دی یێن عیراقێ و ژیان ل شنگالێ ئاسایی ببیت و خەلکێ وێ ڤەگەریت سەر جه و وارێن خۆ، و ل هەر جەژن و هەلکەفتەکێ هێڤییا مە یا هەرە سەرەکی ئەوە کەیسا جینوسایدا ئێزدییان بهێتە ئێک لاکرن ژلایێ دادگەها نیڤدەولەتی یا تاوانان داکو تاوانبار بگەهنە سزایا خۆ و قوربانی ژی بهێنە قەرەبوکرن، دیسان دخوازین کوردستان رۆژ ب رۆژ ئازادتر و پێشکەفتی تر ببیت".

 

سەجا شێرزاد