مەسیحیێن دهۆکێ ژی بەژداری بازارێن شەڤانێن رەمەزانێ دبن
دھۆک-KDP.info- هەر ژمێژەیە و دهۆک ب باژێرێ پێکڤەژیانا ئاین و ئول و نەتەوە و پێکهاتەیێن جودا یا بەرنیاسە، و تێدا ب بێ جوداهی و یەکتر قەبولکرنێ دژین، ژلەوما ژی دبێژنێ دهۆکا رەنگین،
دڤێ رەمەزانێ دا ژی رەنگڤەدانا پێکڤە ژیانێ و خۆشیێ دیارە، دئێک ژبازاراێن شەڤێن رەمەزانێ دا ل تێرمینالێ ل سەنتەرێ دهۆکێ، دەهان خێزان و گەنج تێدا هاتن و چوونێ و بازارکرنێ دکەن، ژسەر و سیما و جل و بەرگان، هەتا ژشێوازێ ئاخفتنێ و زمانی دیارە، کو گەلەک ژخێزانێن جودا هەنە، کوردێن بەهدینانن، و هندەک خێزانێن سورانن و عەرەب ژی دناڤ وان دا هەنە، و ئێک ژدیمەنێن جوان و سەرنجراکێش ل بازاری، هەبوونا چەند خێزانەکێن کرستیان بوو، کو ب ئێک هەست و دڵ دگەل خێزانێن موسلمان خۆشی و شادی دئێخستە بازاری.
بابێ یارایێ، هاولاتیێ دهۆکێ یە، دەمێ ستافێ مالپەری دیتی ب خێرهاتنەکا گەرم لێ کر و گوت: ئەم ئەڤرۆ دگەل برایێن خۆ یێن موسلمان دڤی بازاری دا ئامادەینە، هاتنا رەمەزانێ بۆ مە ژی جهێ دل خۆشیێ یە، رەوشا دهۆکێ گەلەک خۆش دبیت و خەلک هەمی کەیف خۆشن، هەمی دەمان ئەز و خێزانا خۆ بەژداری ڤێ خۆشیێ دبین.
سالی، ئەو ژی هاولاتییەکا گەنج یا دهۆکێ یە، ئەو دگەل هەڤاڵێن خۆ مژویلی هەلبژارتنا جورەکێ جل و بەرگان بوو ل ئێک ژخیڤەتێن بازاری، بۆ مالپەری گوت: چ جوداهی دناڤ بەرا مە و موسلمانان دا نینە، یا گرنگ ئەوە رەوشا کوردستانێ و دهۆکێ یا باش بیت، ئەڤە دێ بۆ مە هەمییان باش بیت، ئەڤرۆ ئەز دگەل دوو هەڤاڵێن خۆ یێن موسلمان هاتیمە، وئەو بۆ من نێزیکترین هەڤاڵن.
دیمەنێن هاریکاری و پێکڤەژیانێ دهەمی یاد و جەژن و هەلکەفتێن دهۆکێ دا دیارە، و هەر ژساڵا ٢٠١٤ێ ل دەمێ داگیرکرنا داعش بۆ باژێرێن میسل و شنگار و دەوروبەران، دل فرەهی و روحا هاریکاریا خەلکێ دهۆک و زاخۆ بۆ هەمی جیهانێ هاتە سەلماندن، و هەتا نوکە ژی، دەست ب دەست، موسلمان و کرستیان و ئێزدی، دهۆکێ و هەرێما کوردستانێ ئاڤا و خۆش دکەن.
ل پارێزگەها دهۆکێ ب گشتی، نێزیک ٤٥ هزار کەسێن کرستیان ئاگنجینە ژکلدان و سریان و ئاشووریان.
سەجا شێرزاد
