زاخۆ.. هەتا نوکە ١٠ خێزانان خانوو وەرگرتینە و ٢٠ دی ژی ب بەردەوامییا رەمەزانێ دێ وەرگرن

زاخۆ-KDP.info- زاخۆ، دیارە نە ب تنێ ب پێشڤەچوونا خۆ یا بلەز و بەردەوام دڤان چەند ساڵان دا دێ ب ناڤ و دەنگ بیت، بەلکو ب هاریکاری و ئێک گرتنێ ژی دێ دەنگ ڤەدەت.

شڤان عەبدی، بەردەفکێ فەرمی یێ ئیدارا سەربەخۆ یا زاخۆ تایبەت بۆ مالپەرێ فەرمی یێ پارتی دیموکراتی کوردستان بەحس ل بەرنامێ خۆ یێ رەمەزانێ کر ل زاخۆ و ل ڤان ١٠ رۆژان چ هاتییە کرن:

"پشتی زاخۆ بوویە ئیدارا سەربەخۆ، ساڵانە و تایبەت ل مەها رەمەزانێ بەرنامێن تایبەت ژبۆ هاریکارییا خێزان و کەسێن هەژار و دەست کورت هەنە، و ساڵ بۆ ساڵی هەوڵ دهێتە دان بەرنامێ مە باشتر و زەنگینتر بیت بۆ هندێ مەزنترین ژمارا کەسان ل دویف شیانان مفادار بن."

ژلەوما ژی دبەرنامێ ئەڤ ساڵە دا:

1. دانا پتر ژ ٣٠ شوقە و خانویان بۆ خەلکێ کێم دەرامەت و پێدڤی.

2. دانا کریێن خواندنێ بۆ ژمارەیەک قوتابیان.

3. دانا کریێن خانوو و شوقەیان بۆ چەندین هاولاتیێن کێم دەرامەت و دەستکورت.

4. دانا نانی ل ٢٧ نانپێژییان ل سنۆرێ ئیدارا سەربەخۆ یا زاخۆ ب بێ بەرامبەر بۆ هەمی هاولاتییان.

5. بهایێن پلێتێن هەمی نۆژداران دێ بنە ١٠ هزار دینارێن عیراقی.

6. کێمکرنا ٢٠٪ ژبهایێن پارەی ل تاقیگەهـ و سۆنار و تیشکان.

7. ٥٠٪ ژقازانجێ هەمی دەرمانخانەیان دێ هێتە کێمکرن کو کێمتر ژنەرخێ ستیکەرێ ئێک لاکری.

8. بهایێن نشتەرگەریێن نەخوەشخانەیێن تایبەت دناڤبەرا ٢٠-٥٠٪ دێ هێتە کێمکرن.

9. پلێتێن هەمی نۆژدارێن ددانان دێ بێ بەرامبەر بن، و هەمی کارێن ددانان دێ ٢٠٪ ژبهایێ وان هێتە کێمکرن.

10. ٢٠ گەشتێن عومرێ دیاری بۆ ٢٠ کەسان دێ هێنە پێشکێشکرن.

نە ب تنێ ئەڤە، بەلکو دوو بازارێن هەرە مەزن هاتینە ڤەکرن، ئێک ژوان بازارێ شەڤێن رەمەزانێ دگەل سرۆدێن ئاینی ل کەلها زاخۆیە تێدا ژمارەیەک خیڤەتان بۆ ژمارەیەک کومپانی و پرۆژەیان هاتینە دانان تێدا کەل و پەلان ب بهایێن گونجای دفروشن، هەروەسا بازارێ ئەرزانێ رەمەزانێ کو بۆ ٦٠ کومپانیێن کەرستەیێن خوراکی هاتییە ڤەکرن تێدا هەمی کەرستە ب بهایێن کوومی یان بهایێن دەسپێکی یێن کومپانیێ دهێنە فروتن ب شێوازەکێ گەلەک کێمتر بن ژبازار و مارکێتان.

 

سەجا شێرزاد