ھەولێر و بەغدا رێککەوتنی نێوان عێراق و ئێرانیان گفتوگۆ کرد"
ھەولێر-KDP.info- ڕێبەر ئەحمەد، وەزیری ناوخۆی حكوومەتی هەرێمی كوردستان لە هەولێر لەگەڵ قاسم ئەعرەجی، راوێژكاری ئاسایشی نەتەوەیی عێراق کۆبووەوە و گفتوگۆیان لەبارەی رێككەوتنی ئەمنی نێوان عێراق و ئێران کرد.
شەممە 22ـی شوباتی 2025، ڕێبەر ئەحمەد وەزیری ناوخۆی حكوومەتی هەرێمی كوردستان لە دیوانی وەزارەتی ناوخۆ پێشوازی لە قاسم ئەعرەجی، راوێژكاری ئاسایشی نەتەوەیی عێراق و شاندێكی یاوەری كرد.
لە كۆبوونەوەیەکدا كە غوڵام ئیسحاق، جێگری نوێنەری سكرتێری گشتی نەتەوەیەكگرتووەكان لە عێراق بۆ كاروباری مرۆیی و پەرەپێدان ئامادەی بوو، گفتوگۆ لەبارەی ئەو بەندكراو و حوكمدراوانە كرا كە لە هەرێمی كوردستان سزایان بەسەردا سەپێنراوە و لەلایەن حكوومەتی فیدرالییەوە داواكراون.
هەردوولا هاوڕابوون لەسەر ئەوەی كێشەی ئەم گیراوانە بەشێوەیەكی یاسایی و بەپێی یاسا كارپێكراوەكانی عێراق مامەڵەیان لەگەڵدا بكرێت و چارەسەرییان بۆ بدۆزرێتەوە.
هەر ئەمڕۆ كۆبوونەوەی لیژنەی هاوبەشی هەرێمی كوردستان و حكوومەتی فیدرالی سەبارەت بە رێككەوتنی ئەمنی نێوان عێراق و ئێران، لە دیوانی وەزارەتی ناوخۆی حكوومەتی هەرێمی كوردستان بەڕێوەچوو.
كۆبوونەوەكە بە ئامادەبوونی ڕێبەر ئەحمەد، وەزیری ناوخۆی هەرێمی كوردستان و قاسم ئەعرەجی، راوێژكاری ئاسایشی نەتەوەیی عێراق بەڕێوەچوو، جەخت لە هەماهەنگی و كاری هاوبەش لەنێوان حكوومەتی هەرێم و حكوومەتی فیدرال و كۆماری ئیسلامی ئێران كرایەوە بە مەبەستی لەیەكتێگەیشتنی زیاتری ئەمنی بۆ ئاسایش و سەقامگیری سنوورەكان کرایەوە.
