شیلان شێخ جەعفەر بۆ KDP: ئەمساڵ کۆنگرەی یەکێتیی قوتابیان و لاوان بەڕێوە دەچێت

هەولێر-KDP.info- بە بۆنەی ١٨ی شوبات، ساڵیادی دامەزراندنی ھەردوو یەکێتیی قوتابیانی کوردستان و لاوانی دیموکراتی کوردستان، بەرپرسی ڕێکخراوە جەماوەرییەکانی پارتی دیموکراتی کوردستان، ئاماژەی بۆ ئەوە کرد: "یەکێتیی قوتابیان و یەکێتیی لاوان، ھەڵگری پەیامی نیشتمانی و نەتەوەیین." و دەشڵێت: چالاکییەکانی ئەمساڵی قوتابیان و لاوان بە شێوەیەکی تر دەبێت.

شیلان شێخ جەعفەر، بەرپرسی رێکخراوە جەماوەرییەکانی پارتی، لە لێدوانێکی تایبەتدا بۆ ماڵپەڕی فەرمیی پارتی دیموراتی کوردستان، گوتی: "بەھۆی پێویستیی مێژووییەوە، ھەردوو ڕێکخراوی یەکێتیی لاوانی دیموکراتی کوردستان و یەکێتیی قوتابیانی کوردستان دامەزران، کە پێویست بوو لەو سەردەمەدا یەکێتییەکی کوردستانیانە بۆ خزمەتکردنی ئەو دوو توێژەی کۆمەڵگە دابمەزرێت، بە تایبەتی لەو سەردەمەدا کێشەی نەتەوەیی ھەبوو، قوتابیان و لاوانیش ھەڵگری پەیامی نیشتمانی و نەتەوەیی بوون، لەسەر ڕاسپاردەی بارزانیی نەمر هەردوو ڕێکخراوی قوتابیان و لاوان لە ١٨ی شوباتی ١٩٥٣ دامەزران."

بەرپرسی ڕێکخراوە جەماوەرییەکانی پارتی ئەوەشی خستە ڕوو کە "ھەردوو ڕێکخراوی قوتابیان و لاوان، ڕۆڵی بەرچاویان ھەبووە لە بەرگریکردن لە مافی قوتابیان و لاوان، ھەروەھا لە کۆڕی خەبات و تێکۆشان و شۆڕشی چەکداریش ھەردوو ڕێکخراوەکە دەستی باڵایان لە خەبات ھەبووە، ھەر لەو ڕوانگەیەوە بارزانیی نەمر قوتابیانی بە سەری ڕم و لاوانی بە شوورەی پۆڵایین ناوزەد کرد، ھەردوو ڕێکخراوەکە خاوەن چەندان شەھیدی سەرکردەن لەپێناو دۆزی ڕەوای گەلی کورد و کوردستان."

شیلان شێخ جەعفەر ئاماژەی بۆ ئەوە کرد، "ڕۆژی سێشەممە یادی ٧٢ ساڵەی دامەزراندنی ھەردوو ڕێکخراوی قوتابیان و لاوانە و ساڵانەش بەبۆنەی ١٨ی شوبات، ساڵڕۆژی دامەزراندنیانەوە، چەندان چالاکی بەڕێوە دەچن، ئەمساڵیش یادی ئەو ڕۆژە پیرۆزە بەرز ڕادەگیرێت، بەڵام بەھۆی کۆنگرە و کۆنفرانسەوە چالاکییەکانی ئەمساڵ وەکو ساڵانی ڕابردوو نابێت."

لەبارەی بەڕێوەچوونی کۆنگرەی یەکێتیی قوتابیان و لاوانەوە، شیلان شێخ جەعفەر گوتی، "ئەمساڵ کۆنگرەی یەکێتیی قوتابیانی کوردستان و یەکێتی لاوانی دیموکراتی کوردستان بەڕێوە دەچێت، بەڵام کاتی بەڕێوەچوونی کۆنگرە دیاری نەکراوە، لیژنەی باڵای سەرپەرشتیار لە کاتێکدا بڕیاری لەسەر دەدات، ھەر کاتێکیش بڕیار دەرچوو ھەردوو ڕێکخراوەکە ئاگادار دەکرێنەوە."

 

قائید میرۆ