پەیوەندییەکانی ئەنجوومەنی پارێزگای نەینەوا و پارتی تاوتوێ کرا
نەینەوا-KDP.info- بەرپرسی مەکتەبی ڕێکخستنی پارتی لە نەینەوا و شاندی یاوەری سەردانی پارێزگاری نەینەوایان کرد، لە کۆبوونەوەیەکدا ھەردوولا جەختیان لەسەر پتەوکردنی زیاتری پەیوەندییەکان و ھەماھەنگی نێوانیان بەمەبەستی خزمەتکردنی زیاتری ھاووڵاتیانی نەینەوا کردەوە.
نەوزاد ھادی، بەرپرسی مەکتەبی ڕێکخستنی پارتی دیموکراتی کوردستان لە نەینەوا و شاندی یاوەری سەردانی عەبدولقادر دەخیل پارێزگاری نەینەوایان کرد و گفتوگۆیان دەربارەی دوایین پێشھاتەکانی پارێزگای نەینەوا و دەورووبەری کرد.
لە کۆبوونەوەکەدا پەیوەندییەکانی نێوان ئەنجوومەنی پارێزگای نەینەوا و پارتی دیموکراتی کوردستان تاوتوێ کرا و ھەردوولا جەختیان لەسەر پتەوکردنی زیاتری پەیوەندییەکان و ھەماھەنگی نێوانیان کردەوە بە مەبەستی خزمەتکردنی زیاتری ھاووڵاتیانی نەینەوا و دەشتی نەینەوا.
