ل وەرزێ زڤستانێ، بلندترین رێژا گەشتیارێن دهۆکێ ل ئامێدیێ دهێتە تۆمارکرن

دهۆک-KDP.info- هاتنا گەشتیاران بۆ هەرێما کوردستانێ ژ وەرزەکی بۆ وەرزەکی و دەڤەرەکێ بۆ دەڤەرەکێ دهێتە گوهۆرین، و ل پارێزگەها دهۆکێ ژمارا گەشتیاران ل وەرزێ هاڤینێ رێژێن هەرە مەزن تۆماردکەت، لێ ل وەرزێ زڤستانێ و ژبەر رێژا بەفر بارینا هەر سال ژمارا گەشتیاران کێمترە.

ل سەر ڤی بابەتی مالپەرێ فەرمی یێ پارتی دیموکراتی کوردستانێ چاڤپێکەفتنەک دگەل شەمال هرۆری، بەرپرسێ راگەهاندنا رێڤەبەریا گشتی یا گەشت و گوزارێ ل پارێزگەها دهۆکێ ئەنجامدا و تێدا شەمال هرۆری گۆت: "ل وەرزێ زڤستانێ ژمارا گەشتیاران ل پارێزگەها دهۆکێ کێمترە ژ وەرزێن دی یێن سالێ، چونکی رێژا بەفر بارینێ بەرامبەر ب راکێشانا گەشتیاران کێمە، لێ ل دەڤەرا ئامێدیێ و چیایێ گارە رێژا هاتنا گەشتیاران دهێتە تۆمارکرن، چونکی دەڤەرەکا چیایی یە و رێژا بارینا بەفرێ ل وێرێ بلندترە ژ دەڤەرێن دی یێن پارێزگەها دهۆکێ."

سالانە حکومەتا هەرێما کوردستانێ ل پارێزگەها دهۆکێ و پارێزگەهێن دی یێن هەرێما کوردستانێ ژی گرنگیەکا تایبەت ب کەرتێ گەشتیاری ددەت، لێ ل پارێزگەها دهۆکێ حکومەتا هەرێما کوردستانێ و رێڤەبەریا گشتی یا گەشت و گوزارێ بزاڤێ دکەت فۆکسا خۆ یا سەرەکی ژبۆ گەشتیارێن زڤستانان بێخیتە ئامێدیێ، چونکی ئامێدی دەڤەرەکا چیایی یە و رێژا هەرە مەزن یا بەفر بارینێ ل وێرێ دهێتە تۆمارکرن.

شەمال هرۆری گۆت: "ل قەزا ئامێدیێ پرۆژێن هەرە باش ل سەر ئاستێ گەشتیاری دهێنە دروستکرن و بەشەک ژ وان پرۆژەیان بەرەڤ قوناغێن دویماهیێ نە ژ وان پرۆژەیان ژی، پرۆژێ ئۆتێلا حەجەری، ئۆتێلا سەن شاین، مەلەڤانگەها ئۆلۆمپی، تەلەفریکا چیایێ گارە."

سەقایێ هەرێما کوردستانێ ل ڤان سالان بەرامبەر ب دەهان سالێن پێشتر هاتیە گوهۆرین، زڤستانا وێ درەنگ دکەڤیت و بارینا بەفر و بارانان درەنگ دبارن. ئەڤێ چەندێ ژی کارتێکرن ل هاتنا گەشتیاران کریە تایبەت یێن ناڤەراست و باشوورێ عیراقێ، و ژبەر ڤێ چەندێ هەتا نوکە چ ژمارە و داتایێن تۆمارکری یێن بەردەست نینن ژبۆ هاتنا گەشتیاران ل سەنتەرێ دهۆکێ.

سەجا شێرزاد