هاتووچۆ بۆ KDP: سیستەمی ئێستا جێبەجێ دەکرێت و گۆڕانی بەسەردا نایه‌ت
سلێمانی-KDP.info- بەڕێوەبەری ھاتووچۆی پارێزگای سلێمانی ڕایدەگەیەنێت، سیستەمی ئەلیکترۆنی مۆڵەتی شۆفێری سەرکەتوو بووە و گۆڕانکاریشی بەسەردا نایەت.
عەمید ئاسۆ محەممەد، بەڕێوەبەری ھاتووچۆی سلێمانی، لە لێدوانێکی تایبەتدا بە ماڵپەڕی فەرمیی پارتی دیموکراتی کوردستانی ڕاگەیاند: ئەو قەڵەباڵغیەی ئێستا لە بەڕێوەبەرایەتیەکانی ھاتووچۆ لە بەشی دەرھێنانی مۆڵەتی شۆفێری ھەیە ھۆکارەکەی بۆ زۆری ژمارەی دانیشتووان و خواست لەسەر دەرھێنانی مۆڵەتی شۆفێری دەگەڕێتەوە، واتا ڕۆژانە ژمارەیەکی بەرچاوی ھاووڵاتیان بۆ دەرھێنان و نوێکردنەوەی مۆڵەتی شۆفێری سەردانی فەرمانگەکانی ھاتووچۆ دەکەن.
بەڕێوەبەری ھاتووچۆی سلێمانی دەشڵێت: سیستەمی ئەلیکترۆنی دەرھێنانی مۆڵەتی شۆفێری سیستەمێکی پێشکەوتووی سەردەمیانەیە، بەڵام ڕەنگە لە دابینکردنی پێداویستی بەپێی خواستی ئێمە نەبێت لە ئامێر و توانای میرۆیی، چونکە لە پارێزگایەکی وەک سلێمانی ڕۆژانە ٨٥٠ تا ٩٥٠ ھاووڵاتی سەردانی بەشی مۆڵەت دەکەن کە ئەو ژمارەیەش کەم نیە.
عەمید ئاسۆ محەممەد ڕوونیشیکردەوە: دەرھێنان و نوێکردنەوەی مۆڵەتی شۆفێری ھیچ گۆڕانکاریەکی بەسەردا نایەت و سیستەمی ئێستا کەوتووتە کار و جێبەجێ دەکرێت، ھاوکات لە نوێکردنەوەی مۆڵەتیش کاتی زۆری ناوێت، بەڵام لەکاتی دەرھێنانی مۆڵەت ھەندێک قەڵەباڵغی دروست دەبێت.
قائید میرۆ
