مەکتەبی سیاسیی پارتی پیرۆزبایى له یه‌كگرتووى ئیسلامیى كوردستان ده‌كات
ھەولێر-KDP.info- مەکتەبی سیاسیی پارتی دیموکراتی کوردستان بە بۆنەی یادی دامەزراندنی یەکگرتووی ئیسلامی کوردستان پیرۆزبایی ئاراستەی ئەمینداری گشتیی یەکگرتووی ئیسلامی کوردستان و ئەندامانی مەکتەبی سیاسی و سەرکردایەتی دەکات.
دەقی پەیامی پیرۆزبایی مەکتەبی سیاسیی پارتی دیموکراتی کوردستان.
بەڕێز/ مامۆستا سەڵاحەددین بەھائەدین ئەمینداری گشتیی یەکگرتووی ئیسلامی کوردستان
بەڕێزان/ ئەندامانی مەکتەبی سیاسی و سەرکردایەتی یەکگرتووی ئیسلامی کوردستان
بەبۆنەی(٣١)ەمین ساڵیادی دامەزراندنی یەکگرتووی ئیسلامی کوردستان، پیرۆزباییەکی گەرم لە ئێوەی بەڕێز و ئەندامان و لایەنگرانتان دەکەین و، ھیوای سەرکەوتن و بەردەوامی بوونتان بۆ دەخوازین.
ڕۆڵی یەکگرتووی ئیسلامی شانبەشانی حزب و لایەنە سیاسییەکانی دیکەی کوردستان لە ڕەوتی سیاسی و حوکمڕانی ھەرێمی کوردستان دیار و کاریگەر بووە، بۆ بەردەوامی ئەو ئەزموونەی ھەوڵ و خەباتی کوردستانیان و خوێنی شەھیدەکانمان ھاتووەتەدی.
لەم بۆنەیەدا جارێکی دیکە جەخت لەسەر ھاوکاری و ھەماھەنگی پتەوی نێوانمان دەکەینەوە و سورین لەسەر زیاتر پێشخستن و پتەوکردنی بنەماکانی دیموکراسی و یەکڕیزیی و تەبایی لە نێوان پارت و ھێزە سیاسییەکانی کوردستان بۆ دابینکردنی ئایندەیەکی گەشتر بۆ ھاووڵاتیان.
جارێکی دیکە پیرۆزباییتان لێدەکەین و ھەر سەرکەوتووبن.
مەکتەبی سیاسیی پارتی دیموکراتی کوردستان
٧ـی شوباتی ٢٠٢٥
