"ئاخفتنا سەرۆک بارزانی ژباوەریا وی یا کویر ب بنەماێن ئیسلامێ دهێت"

دھۆک-KDP.info-  کوردستان جڤاکەکێ رەسەنە و خودان شارستانیەتەکا کەڤنە، پێدڤی ب پاراستنا بەها و رەسەنایەتیا خۆ هەیە، نە ب تیۆریێن دەرەکی یێن سەپاندی"، ئەڤە بەشەک ژگوتنا زیبا تەهایە، سکرتێرا ئێکەتییا ئافرەتێن کوردستانێ، ل سەر گوتنا سەرۆک مەسعود بارزانی دەربارەی دونالد ترامپی سەروکێ ئەمێریکا دەمێ راگەهاندی کو ل ئەمێریکا ب تنێ دوو رەگەز هەنە ئەو ژی نێر و مێنە.

پشتی سەرۆک مەسعود بارزانی دچاڤپێکەفتنا خۆ یا دویماهیێ دا پشتەڤانی ل بابەتێ ناڤبری کری مالپەرێ فەرمی یێ پارتی دیموکراتی کوردستان چاڤپێکەفتنەک تایبەت دگەل زیبا تەها ئەنجامدا و تێدا زیبایێ گوت:”ئاخفتنا سەرۆک بارزانی ژباوەریا وی یا کویر ب بنەماێن ئیسلامێ دهێت، کو دبینیت جڤاکێ کوردستانێ جڤاکەکێ رەسەنە و خودان شارستانیەتەکا کەڤنە، پێدڤیە پاراستنا رەسەنایەتیا مرۆڤایەتی و بەهایێن مرۆڤی یێن خۆ بکەت و نەهێلیت چ تیۆری و هزرێن دەرەکی بهێنە سەپاندن لسەر ڤی جڤاکی کو دژی بەها و پێدڤیێن وی بن” جڤاک ب سروشتێ خۆ ژدوو رەگەزان پێک دهێت، ژن و زەڵام، نێر و مێ، هەروەکی خودێ ئەو ئافراندینە بۆ بەردەوامیا ژیانێ و پارڤەکرنا خۆشی و نەخۆشیان، و هەر گوهۆرینەک دڤێ ئافراندنێ دا دژی سروشت و هەبوونێیە و بێگومان دێ کارتێکرنێن نەرێنی هەبن.

ژلایێ ئاینی ڤە مامۆستایێ ئاینی ناسر رەسول بۆ kdp ڤێ چەندێ دووپات دکەت و دبێژیت: “خودایێ مەزن دقورئانێ دا دفەرمووت {وَمِنْ كُلِّ شَیْءٍ خَلَقْنَا زَوْجَیْنِ} ئانکو ژهەمی ئافراندیێن خودێ دوو جوت هەنە، و چ پێ نەڤێت ژوان ژی مرۆڤە کو ژدوو رەگەزان ب تنێ هاتییە دروستکرن و سێیەم بۆ نینە و ئایەتەکا دی ڤێ چەندێ دسەلمینیت، {یَا أَیُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى}، ئەڤەژی موعجیزەیا گەردوونی یە بۆ هندێ ژیان ب هەردوو رەگەزان بەردەوام ببیت ئەگەر نە ئەڤ هزرە نە ژهزرێن مێشکەکێ سافێ مرۆڤییە، چونکە دقورئانێ دا گوتنا شەیتانی هاتییە دەمێ دبێژیت {وَلَآمُرَنَّهُمْ فَلَیُغَیِّرُنَّ خَلْقَ اللَّهِ} و چ پێ نەڤێت ئەڤ چەندە ب دژی فیترە و ناخێ مرۆڤایەتیێ یە نە ب تنێ بابەتەک ئاینی یە، چونکە ئەم دبینین نە ب تنێ موسلمان ڤێ چەندێ رەت دکەن بەلکو گەلەک کەس ژئانێن دی ژی ڤێ چەندێ رەت دکەن {فَأَقِمْ وَجْهَكَ لِلدِّینِ حَنِیفًا فِطْرَتَ اللَّهِ الَّتِی فَطَرَ النَّاسَ عَلَیْهَا لَا تَبْدِیلَ لِخَلْقِ اللَّهِ}.

وەک دبینین، دیاردەیا پر-رەگەزی دجڤاکێن رۆژئاڤایی دا کارتێکرنێن خراب هەنە و نە بێ ئەگەرە کو سەرۆکێ ئەمریکا قەدەغە دکەت، ژلایێ تەندروستی ڤە نوژدارێ تایبەتمەندێ نەخۆشیێن دەروونی د.عەدنان ئەسعەد بۆ KDP دیاردکەت کو “گهورین بۆ رەگەزێ بەرامبەر یان هاورگەز بازی ب تەمامی دژی یاسایێن ژیانێ و ئەردی یە و هزر کرن تێدا و کارکرن پێ ئێشێن دەروونی یێن دژوار و دیاردەیێن نەجوان یێن جڤاکی ب دویف خۆ دئینیت وەک خەمووکی و دویربوون ژجڤاکی و هەتا دگەهیتە خۆ کوشتنێ، چونکە هاورەگەزباز ل دویف ئارمانجەکا نەگەه دچیت کو نەشێت چو جاران ب تەمامی ب دەستخۆڤە بینیت، و دمینیت جهێ نە قەبولکرنێ ژلایێ دەوروبەرێن خۆڤە، و ئەڤە هەمی ئاریشێن جڤاکی نە نابیت ب چ رێکان بهێنە ئازراندن و دیتن”.

ل دویماهیێ زیبا تەھا دبێژیت: “دەمێ تۆ دخوازی تیۆری و بیروباوەرەکێ بێژی، پێتڤیە بۆ چارەسەریا پرسان بیت، نە کو پرسان درست بکەت، و پرسێن جڤاکا مە گرێدایی نەوەکهەڤی و نەدادپەروەریێ نە دناڤبەرا ژن و مێران دا، پێدڤیە هەولێن مە بۆ گەهشتنا ماف و دەرفەت و دەستکەفتێن وەکهەڤ بن دناڤبەرا ژن و مێران دا، ژوێ پتر پرسەکا دی نینە وەک یا دجڤاکێن رۆژئاڤایی دا هەی”.

پارێزەر عەبدولمەجید کوچەر بۆ KDP” ئاشکەرا دکەت کو دیاسایا سزادانا عیراقی یا ژمارە ١١١ یا ساڵا ١٩٦٩ێ دا، و دمادەیا ٣٩٣ و هەتا مادەیا ٣٩٩ێ ئانکو د٧ مادەیێن یاسایی دا بەحس ل هاورەگەز بازیێ هاتییە کرن کو تێدا ب تاوان هاتییە قەلەم دان و رێ ب چ رەنگا پێ نە هاتییە دان و جاران سزایا وێ گەهشتییە زیندانکرنێ. ژبەر هەمی وان ئەگەرێن هاتین بەحس کرن ئاخفتنا سەرۆکی بەرسڤدانا پرسیارەکا گرنگە و ب دلنیاییڤە جڤاک ب رەزامەندیەکا مەزن پێشوازیێ لێ دکەت.

سەجا شێرزاد