"ئەم هەنگاوەی سەرۆک بارزانی هەنگاوێکی گرنگە بەرەو داهاتوویەکی گەشتر"
دهۆك-KDP.info- سەرۆکی بنکەی لالشی رۆشنبیری و کۆمەڵایەتی دەڵێت، بە وردی و قووڵی دەڕوانمە لێدوانە مێژووییەکەی سەرۆک بارزانی سەبارەت بە بەکارهێنانی وشەی 'پێکهاتەکان' لەجیاتی 'کەمینەکان'. ئەم گۆڕانکارییە لە زمان و دەربڕیندا، زیاتر لە گۆڕینی وشەیەکە، ئەمە گۆڕانکارییەکی بنەڕەتییە لە تێڕوانین و تێگەیشتنی کۆمەڵایەتی و سیاسی.
سەعید جردۆ، بۆ ماڵپەڕی فەرمیی پارتی دیموکراتی کوردستان گوتی: لێدوانە مێژووییەکەی سەرۆک بارزانی سەبارەت بە بەکارهێنانی وشەی 'پێکهاتەکان' لەجیاتی 'کەمینەکان' زیاتر لە گۆڕینی وشەیەکە، ئەمە گۆڕانکارییەکی بنەڕەتییە و ئەم وشەیە دان دەنێت بە ڕۆڵی مێژوویی و بنەڕەتیی هەموو گرووپە ئایینی و نەتەوەییەکان لە دروستکردنی شوناسی کوردستاندا. كە بەشێکی سەرەکی و دانەبڕاوین لە رابردوو، ئێستا و داهاتووی کوردستاندا.
جردۆ گوتیشی: ئەم دەستەواژەیە پەیامێکی روونی هەیە بۆ نەوەکانی داهاتوو لە کوردستاندا، کە هیچ گرووپێک 'کەمینە' نییە، بەڵکو هەموویان بەشێکن لە پێکهاتەی سەرەکیی کۆمەڵگە، ئەمەش کاریگەریی ئەرێنیی لەسەر خۆناسین و متمانەبەخۆبوونی نەوەکانی داهاتوو دەبێت.
سەرۆکی بنکەی لالش ئاماژەشی دا: ئەم هەنگاوە دەبێتە هۆی بەهێزکردنی پێکەوەژیان و لێکتێگەیشتن لە نێوان هەموو پێکهاتەکاندا. کاتێک هەموو گرووپێک هەست بە یەکسانی و رێزلێگرتن بکات، ئەوا کۆمەڵگایەکی تەندروستتر و یەکگرتووتر دروست دەبێت.
دەشڵێ: ئەم گۆڕانکارییە لە زماندا، دەتوانێت ببێتە نموونەیەک بۆ ناوچەکە و جیهان لە چۆنیەتیی مامەڵەکردن لەگەڵ فرەیی کۆمەڵایەتی و ئایینی. کوردستان دەتوانێت ببێتە نموونەیەکی سەرکەوتوو لە پێکەوەژیانی ئاشتیانە و رێزگرتن لە جیاوازییەکان.
سەرۆکی بنکەی لالش، پێشنیازیش دەکات کە ئەم گۆڕانکارییە زمانەوانییە ببێتە بەشێک لە سیستمی پەروەردە و میدیا. پێویستە منداڵانمان فێر بکەین کە فرەیی کۆمەڵایەتی و ئایینی، سەرچاوەی دەوڵەمەندی و هێزە، نەک لاوازی. هەروەها، پێویستە ئەم تێڕوانینە نوێیە ڕەنگدانەوەی هەبێت لە یاسا و رێساکانی هەرێمی کوردستان و دەبێت هەموو پێکهاتەکان بە یەکسانی بەشداری لە بڕیاردان و دامەزراوە حکوومییەکاندا بکەن.
هێمای بۆ ئەوەش کرد: ئەم هەنگاوەی سەرۆک بارزانی، نیشانەی تێگەیشتنێکی قووڵە لە گرنگیی یەکڕیزی و یەکگرتوویی گەلی کوردستان. ئەمە سەرەتای رێگایەکی درێژە، بەڵام هەنگاوێکی گرنگە بەرەو داهاتوویەکی گەشتر بۆ هەموو پێکهاتەکانی کوردستان.
کــاروان بــاعەدری
