رێژا کەسکاتییا دهۆک گەهشتە ١٣٪
دھۆک-KDP.info- سەروکاتییا باژێرڤانییا دهۆکێ دیارکر، رێژەیا کەسکاتیێ ل دهۆکێ گەهشتییە ١٣٪، و دنوکە دا دوو پارکێن هەرە مەزن دهێنە دروستکرن و دگەل ب دویماهیک ئینانا وان، لەوانەیە رێژە بگەهیتە ٢٠٪.
کەسکاتی، ئەو رەنگێ جوانێ ژینگەه دوستان، زێدەبوونا وێ زێدەبوونا ژیانێ یە، حکومەتا هەرێما کوردستانێ و رێڤەبەرییا دهۆکێ، بزاڤەکا بەردەوام دکەن ژبوی دروستکرنا مەزنترین رووبەرێ ئەردێ کەسک.
ئیسماعیل موستەفا بەرپرسێ راگەهاندنا سەروکاتییا باژێرڤانییا دهۆکێ دلێدوانەک بۆ مالپەرێ فەرمی یێ پارتی دیموکراتی کوردستان، دبێژیت: "دهۆک ئێک ژوان باژێرێن هەرێما کوردستانێ یێن گەشتیارییە، سروشت و سەقا و ژینگەها وێ ژیەکێن هەرە گرنگن، هەم ژبوی راکێشانا گەشتیاران و هەم ژبوی ساخلەمی و پاراستنا خەلکێ وێ".
ل ساڵا ٢٠٢٤ێ، مەزنترین هەوەیا دارچاندنێ ل سەر ئاستێ پارێزگەها دهۆکێ و عیراقێ وەک پرۆژە هاتە ئەنجامدان، ئەو ژی دروستکرنا دوو مەزنترین پارکان بوو، ئێک ژوان ل سەر رووبەرێ ٦٦٠ دونەمێن ئەردی، و یا دی ژی ل سەر رووبەرێ ٤٦ دونەمێن ئەردی یە،
رووبەرێ باژێرێ دهوك پێکدهێت ژ٧٦ كلومێترێن دووجار، دیسان روبەرێ قەزا دهوك پێکدهێت ژ٩٥٥ كلومێترێن دووجار، و روبەرێ پارێزگەها دهوك ب گشتی پێکدهێت ژ١٠٩٠٧ كلومێترێن دووجار، و ل سەر ڤی رووبەری ل سەنتەرێ باژێرێ دهۆکێ ل دویف وان ئامارێن ئیسماعیل موستەفای تایبەت بۆ kdp دیارکرین ١٤٣ پارک و باخچە هەنە، و رێژا کەسکاتیێ ب وان باخچە و پارکان دگەهیتە ١٣٪، و ل سنوورێ دەوروبەرێن باژێرێ دهۆکێ ل دویف وان ئامارێن ئەمیر موحەمەدی بەرپرسێ راگەهاندنا رێڤەبەرییا باژێرڤانیێن پارێزگەها دهۆکێ تایبەت بۆ kdp دیارکرین، ١٦٨ پارک و باخچە هەنە، و رێژا کەسکاتیێ نێزیک ١٢٪ یە، و هەژی گوتنێ یە ستاندەرێ دەڤەرێ یێ کەسکاتیێ ١٧٪ یە.
رێژا کەسکاتیێ ل پارێزگەها دهۆکێ ل سەر دەڤەران یەکسان نینە، ئانکو ژدەڤەرەک بۆ دەڤەرەکێ جودایە، ل هندەک دەڤەرێن پارێزگەها دهۆکێ رێژا کەسکاتیێ بلندە و دگەهیتە ٥٠٪ وەکو دەڤەرێن زاویتە، ئامێدی، بامەرنێ و هتد.. چونکە سروشتێ ڤان دەڤەران دارستانن و کەسکاتییە، و ل هندەک دەڤەرێن دی ژی کێمە وەک دەڤەرێن شاریا، مسێریک، دومیز، و هتد.. چونکە پلەیێن گەرمیێ لێ بلند دبن و ژێدەرێ ئاڤێ ژی کێمە.
ژبەر کو حکومەتا هەرێما کوردستانێ تەکەزێ ل وێ چەندێ دکەت کو کەرتێ تایبەت و خەلک بخۆ ژی دپروسەیا کەسککرنا باژێری دا بەژدارببن، سەروکاتییا باژێرڤانییا دهۆکێ دگەل دانا هەر دەستویرییەکا ئاڤاکرنێ خودانێ مامەلێ نەچاردکەت پتر ژدارەکێ دئاڤاهیێ خۆ دا بچینت، و هۆسا هەر یەکەیەک نێشتەجێبوونێ دێ بەژداربیت دپرۆسەیا کەسکرنێ دا.
هەژی گوتنێ یە، ل پارێزگەها دهۆکێ بەرمایکێن کارگەها گلێشێ ئەوا ل کواشێ(دهۆک) وەکو زبل(پەین) بۆ بهێزکرنا داروبارێ دهۆکێ و پارکێن نوی هاتە بکارئینان، و ئەڤە ژی وەک پێنگاڤەک نایاب دهێتە هەلبژارتن ژبۆ پاراستنا ژینگەهێ.
سەجا شێرزاد
