بڕیارە ئەوانەی ماون لە ساڵی نوێ شووقەیان بەسەردا دابەش بکرێت
ھەولێر-KDP.info- بریکاری وەزارەتی شەھیدان و ئەنفالکراوان دەڵێ، ساڵی داھاتوو لە پارێزگای دھۆک و ئیدارەی زاخۆ شووقە بەسەر کەسوکاری شەھیدان و زیندانیانی سیاسی دابەش دەکرێت.
د.ناڤسەر نووری، بریکاری وەزارەتی شەھیدان و ئەنفالکراوان، بە ماڵپەڕی فەرمیی پارتی دیموکراتی کوردستانی ڕاگەیاند: "بڕیارە لە ساڵی نوێ بەھەماھەنگی لەگەڵ دەزگای خێرخوازی بارزانی ژمارەیەک شووقە بۆ کەسوکاری شەھیدان و زیندانیانی سیاسی لە ئیدارەی سەربەخۆی زاخۆ دروست بکەین و دوای تەواوبوونیان ڕادەستی خانەوادەی سەربەرزی شەھیدان و ئەنفال و زیندانیانی سیاسی دەکرێت".
بریکاری وەزارەتی شەھیدان گوتیشی: "لە پارێزگای دھۆکیش پێشتر وەجبەیەک شووقە بەسەر خانەوادەی شەھیدانی تیرۆر دابەشکراون، بڕیارە ئەوانەی ماون لە ساڵی نوێ شووقەیان بەسەردا دابەش بکرێت و ھەر خانەوادەیەکی شەھیدی تیرۆر سوودمەند دەبێت لە وەرگرتنی شووقەیەک".
د.ناڤسەر نووری ئاماژەی بۆ ئەوەشکرد: "ئەمساڵ بە ھەماھەنگی لەگەڵ دەزگای خێرخوازی بارزانی لە ئیدارەی سەربەخۆی سۆران و لە ھەولێریش شووقە دراون بە خانەوادەی شەھیدانی تیرۆر، پڕۆسەکە بەردەوامی دەبێت چ دابینکردنی شووقە و یەکەی نیشتەجێبوون بێت یاخود دابەشکردنی زەوی بێت بۆ کەسوکاری شەھیدان و زیندانیانی سیاسی".
قائید میرۆ
