سەرۆكی هەرێمی كوردستان پیرۆزبایی لە خوشك و برایانی ئێزیدی ده‌کات
ھەولێر-KDP.info- سەرۆكی هەرێمی كوردستان بەبۆنەی هاتنەوەی (جه‌ژنا ڕۆژى یێن ئێزى) پەیامێكی پیرۆزبایی ئاراستەی خوشك و برایانی ئێزیدی كرد و هیوای جەژنێكی خۆش و پشوویەكی ئارامی بۆ هەمووان خواست.
نێچیرڤان بارزانی سەرۆكی هەرێمی كوردستان رایگەیاند، "هەرێمی كوردستان لە هەوڵەكانی بەردەوام دەبێت بۆ باشتركردنی دۆخی ژیان و ئاوەدانكردنەوەی زیاتری ناوچەكانی ئێزدییان".
دەقی پەیامی پیرۆزباییەكەی سەرۆكی هەرێمی كوردستان:
جه‌ژنا ڕۆژى یێن ئێزى ب گه‌رمى ل ڕێزداران میر و جڤاتا ڕووحانی و ته‌ڤایا خوشك و برایێن مه یێن ئێزدى ل كوردستانێ، عیراقێ و ل هه‌ر جهه‌کێ بن، پیرۆز دکه‌م. هیڤییا جه‌ژنه‌كا خۆش و بێهنڤه‌دانه‌كا ئارام و ته‌نا بۆ هه‌میا دخوازم.
خوشك و برایێن مه یێن ئێزدى پشتڕاست دکه‌ین کو کوردستان دێ هه‌ر مینیت وه‌لاتێ پێکڤه‌ژیانێ بۆ هه‌می پێکهاته‌یان و دێ هه‌ر پشته‌ڤان و پارێزڤانێن ماف و داخوازێن وان یێن ڕه‌وا بین، هه‌روه‌سا دێ هاریکار بین بۆ باشترکرنا ڕه‌وشا ژیانا وان و ئاڤه‌دانکرنا ده‌ڤه‌رێن وان.
جه‌ژن ل هه‌میا پیرۆز بیت، هه‌ر سال ب خێر و خۆشى.
نێچیرڤان بارزانی
سه‌رۆکێ هه‌رێما کوردستانێ
١٩/١٢/٢٠٢٤
