مەکتەبی پەیوەندییەکانی دەرەوەی پارتی: پۆڵەندا و کوردستان پەیوەندییەکی بەھێزیان ھەیە
ھەولێر-KDP.info- مەکتەبی پەیوەندییەکانی دەرەوەی پارتی دیموکراتی کوردستان، لە پەیامێکدا پیرۆزبایی سەربەخۆیی لە پۆڵەندا دەکات، ئەمەی خوارەوە دەقی پەیامەکەیە:
بە بۆنەی ڕۆژی سەربەخۆیی پۆڵەندا، لە دڵەوە پیرۆزبایی خۆمان ئاراستەی حکوومەت و گەلی پۆڵەندا دەکەین لە ڕێگای کۆنسوڵخانەی گشتی لە ھەرێمی کوردستان، کە نوێنەرایەتیی پۆڵەندا دەکات، ھیوای سەرکەوتن و خۆشگوزەرانی و ئاشتیی ھەمیشەیی بۆ نەتەوەی پۆڵەندا دەخوازین.
پۆڵەندا و ھەرێمی کوردستان پەیوەندییەکی لەمێژینە و بەھێزیان ھەیە، کە لەسەر بنەمای بەھاکانی ئازادی و ئاشتی و پێشکەوتن دامەزراوە. گەلەکەمان بە ئەزموونی ھاوبەشی خۆڕاگری و بەدەستھێنانی خۆشگوزەرانی و ئازادی بۆ کۆمەڵگاکانمان یەکگرتووە.
خەڵکی ھەرێمی کوردستانیش، ڕێزێکی زۆر لەو پاڵپشتی و دۆستایەتییە ھەمیشەییە دەگرێت، کە پۆڵەندا بۆ گەلی کوردستان ھەیبووە، پێزانینمان بۆ بەردەوامیی ھاوکاری و ھاودەنگیی نێوان گەلانمان ھەیە.
لە کاتێکدا یادی ئەم ڕۆژە گرنگە پیرۆزە دەکەینەوە، چاومان لە پتەوکردنی پەیوەندییەکانە لە تەواوی بوارەکاندا بە ئامانجی بەھێزترکردنی دۆستایەتی و ھاوکاریی نێوان پۆڵەندا و ھەرێمی کوردستان و بەدەستھێنانی داھاتوویەکی سەرکەوتوو و گەشاوەتر.
