سه‌رۆکی حکوومەت پێشوازیی لە باڵیۆزی ئه‌مه‌ریكا لە عێراق كرد
ھەولێر-KDP.info- باڵیۆزی ئەمەریکا لە عێراق پیرۆزبایی لە سەرۆکی حکوومەتی ھەرێمی کوردستان دەکات بەبۆنەی سەرکەوتنی ھەڵبژاردن، ھاوکات ھەردوولا پێویستیی چارەسەرکردنی کێشەکانی بەردەم پڕۆسەی ھەناردەکردنەوە نەوتیان تاووتوێ کرد.
ئێوارەی ئەمڕۆ سێشەممە ١٠/٢٩، مەسروور بارزانی، سەرۆکی حکوومەتی ھەرێمی کوردستان، پێشوازی لە ئێلینا ڕۆمانۆوسكى، باڵیۆزی ئەمەریکا لە عێراق کرد.
بابەتی سەرەکیی گفتوگۆکان تایبەت بوو بە ھەڵبژاردنی پەرلەمانی کوردستان و ئەنجامەکانی. باڵیۆزی ئەمەریکا پیرۆزبایی سەرکەوتنی ھەڵبژاردنی لە سەرۆکی حکوومەت کرد و ئاماژەی بەوە دا کە پڕۆسەکە بە شێوەیەکی ڕێکوپێک و لە کەشێکی ئاسایی و ئاشتییانە بەڕێوەچوو و ڕێژەی بەشداریش بەرز بوو.
ھەردوولا ھاوڕابوون لەسەر گرنگیی دەستکردن بە ڕێکارەکانی پێکھێنانی کابینەی نوێ و لەیەکتێگەیشتنی لایەنە سیاسییەکانی ھەرێمی کوردستان لەمبارەیەوە.
لە بەشێکی دیکەی کۆبوونەوەدا، ھەوڵەکانی دەستپێکردنەوەی ھەناردەکردنی نەوتی ھەرێمی کوردستان و پێویستیی چارەسەرکردنی کێشەکانی بەردەم پڕۆسەی ھەناردەکردنەوە تاووتوێ کرا.
