عەلی حوسێن: پارتی هێڵی سووری نییە بەڵام دەبێت لایەنەكان قەبارەی خۆیان بزانن
سلێمانی-KDP.info- بەرپرسی مەكتەبی ڕێكخستنی سلێمانی - هەڵەبجەی پارتی دیموكراتی كوردستان لە هەردوو پارێزگای سلێمانی – هەڵەبجە ڕایدەگەیەنێت كە پارتی بۆ گفتوگۆی پێكهێنانی حكوومەت هێڵی سووری لەسەر هیچ لایەنێك نییە، بەڵام بەو مەرجەی هەر لایەنێك قەبارەی خۆی بزانێت.
عەلی حوسێن، بەرپرسی مەكتەبی ڕێكخستنی سلێمانی - هەڵەبجەی پارتی لە كۆنگرەیەكی ڕۆژنامەوانیدا گوتی: هەرچەندە ڕێژەی بەشداریكردن لە هەڵبژاردن لە پارێزگایەك بۆ پارێزگایەكی دیكە جیاوازی هەبووە، بەڵام بەشێوەیەكی گشتی ڕێژەی دەنگدان بەرزە و زۆر باشە.
گوتیشی: لە هەردوو پارێزگای سلێمانی و هەڵەبجە دەنگی پارتی بەڕێژەیەكی بەرچاو زیادی كردووە.
عەلی حوسێن هەروەها گوتی: بە تەنیا دەنگی پارتی لە دهۆك بەقەد هەموو دەنگی یەكێتییە لە هەر چوار پارێزگاكەدا.
بەرپرسی مەكتەبی ڕێكخستنی سلێمانی - هەڵەبجەی پارتی جەختیشی كردەوە كە بۆ گفتوگۆی پێكهێنانی حكوومەت، پارتی هێڵی سووری لەسەر هیچ لایەنێك نییە، بەڵام لایەنەكان دەبێت قەبارەی خۆیان بزانن.
سه‌لاح جه‌لال
