پەیامی سەرۆک بارزانی بۆ کۆچی دوایی پڕۆفیسۆر د. خەلیل ئیسماعیل
ھەولێر-KDP.info- سەرۆک بارزانی، بەبۆنەی کۆچی دوایی د. خەلیل ئیسماعیل، سەرەخۆشیی لە دکتۆرە شووکریە ڕەسوڵ هاوسەری د. خەلیل کرد.
دەقی پرسەنامەکەی سەرۆک بارزانی.
بەناوی خودای مەزن و دلۆڤان
بەداخێکی زۆرەوە ھەواڵی کۆچی دوایی ئاکادیمی و زانای کورد پڕۆفیسۆر (د. خەلیل ئیسماعیل)ـم پێ گەیشت. پڕۆفیسۆر د. خەلیل ئیسماعیل کەسایەتییەکی نیشتیمانپەروەر بوو کە ژیانی خۆی بۆ خزمەتکردنی زانست و پێگەیاندنی سەدان قوتابی و زانستخوازی کوردستان تەرخان کرد و جێی دەستی لە خزمەتکردنی ناوەندە ئاکادیمیاکان و دەوڵەمەندکردنی کتێبخانەی زانستیی کوردستان دیارە و، لەدەستدانی خەسارەتێکی گەورەیە.
سەرەخۆشی خۆم ئاراستەی دکتۆرە (شوکریە ڕەسوڵ)ـی ھاوسەری خوالێخۆشبوو پڕۆفیسۆر د. خەلیل ئیسماعیل و خانەوادە و کەسوکاری و تەواوی ئاکادیمییەکانی کوردستان و مامۆستایانی زانکۆ دەکەم و خۆم بە ھاوبەشی خەمیان دەزانم.
لە خودای گەورە داواکارم ڕۆحی خوالێخۆشبوو بە بەھەشتی بەرین شاد بکات و سەبر و ئارامی بەھەموو لایەک ببەخشێت.
مسعود بارزانی
٩ی تشرینی یەکەمی ٢٠٢٤
