پارێزگارێ دهۆكێ رێنمایێن نوى یێن ئێمناهیێ و كۆمسیۆنێ راگه‌هاندن
دهۆك-KDP.info- د. عه‌لى ته‌ته‌ر، پارێزگارێ دهۆكێ ئه‌ڤرۆ رۆژا ئێكشه‌مبى 29/9/2024 ب ئاماده‌بوونا "خالد عه‌باس" رێڤه‌به‌رێ كۆمسیۆنا بلند یا هه‌لبژارتنان ل پارێزگه‌ها دهۆكێ د كۆنگره‌كێ رۆژنامه‌ڤانى دا رێنمایێن نوى یێن ئێمناهیێ و كۆمسیۆنێ راگه‌هاندن.
د. عه‌لى ته‌ته‌ر، پارێزگارێ دهۆكێ ئاشكرا كر كو پشتى ئه‌ڤرۆ كۆمبوونه‌ك بۆ هه‌لسه‌نگاندنا ره‌وشا هه‌وا بانگه‌شه‌یا هه‌لبژارتنێن په‌رله‌مانێ كوردستانێ هاتیه ئه‌نجامدان، جهێ خوه‌شحالیێ یه كو ئه‌ڤ بانگه‌شه ب شێوه‌یه‌كێ ئارام دهێته ئه‌نجامدان و چ ئاریشێن ئێمناهیێ و سیاسى ل سنوورێ پارێزگه‌ها دهۆكێ په‌یدانه‌بووینه و گۆت: "هنده‌ك حاله‌تێن زێده‌گاڤیان ل سه‌ر مافێن وه‌لاتیان و هاتنوچوونا گشتى په‌یدابووینه، به‌لێ لایه‌نێن په‌یوه‌ندیدار بۆ ڤێ مه‌ره‌مێ هاتینه راسپاردن كو وان زێده‌گاڤیان ڕاكه‌ن و كۆمسیۆن ژى دێ هنده‌ك حاله‌تان سزاده‌ت".
پارێزگارێ دهۆكێ ئاماژه دا وێ چه‌ندێ كو نابیت بانگه‌شه‌یا هه‌لبژارتنان ببیته ئه‌گه‌رێ بێزاریا وه‌لاتیان و گۆت: "لایه‌نێن په‌یوه‌ندیدار ب هوورى دووڤچوونا ڤێ بانگه‌شه‌یێ دكه‌ن بۆ وێ چه‌ندێ سه‌رپێچى نه‌هێنه‌كرن".
رێوار محه‌مه‌د ره‌شید
