ساخله‌میا دهۆكێ ده‌لیڤێن دامه‌زراندنێ راگه‌هاندن
دهۆك-KDP.info- رێڤه‌به‌ریا گشتى یا ساخله‌میێ ل پارێزگه‌ها دهۆكێ ئه‌ڤرۆ رۆژا ئێكشه‌مبى ده‌لیڤێن كارى بۆ نه‌خۆشخانا 100 ته‌ختى ل سنوورێ قه‌زا ئامێدیێ ڕاگه‌هاندن كو دامه‌زراندن دێ ب شێوه‌یێ كرێیا رۆژانه بیت.
د. ئه‌فراسیاب موسا، رێڤه‌به‌رێ گشتى یێ ساخله‌میێ ل پارێزگه‌ها دهۆكێ دیار كر كو نوكه كار د بجهئینانا پرۆژێ نه‌خۆشخانا 100 ته‌ختى ل سنوورێ قه‌زا ئامێدیێ د قووناغێن دووماهیێ دایه كو ل هه‌یاما بورى به‌رێ بنیاتى بۆ ڤێ نه‌خۆشخانێ ل دووڤ راسپاردا سه‌رۆكێ حكومه‌تا هه‌رێما كوردستانێ ب گۆژمێ 43 ملیۆن دۆلاران هاتبوو دانان و گۆت: "ئامیره و پێدڤیێن نۆشدارى بۆ ڤێ نه‌خۆشخانێ گه‌هشتینه و سه‌رۆكێ حكومه‌تا هه‌رێما كوردستانێ بڕیاردایه 250 كارمه‌ند و فه‌رمانبه‌ر دێ بۆ ڤێ نه‌خۆشخانێ ب شێوه‌یێ كرێیا رۆژانه هێنه دامه‌زراندن بۆ ڤێ مه‌ره‌مێ ژى ئه‌ڤ كارمه‌نده ل سه‌ر لینكه‌كى ب شێوه‌یێ ئۆنلاین دشێن پێشكێش بكه‌ن".
هه‌ژى گۆتنێ یه كو ئه‌و كه‌سێ پێشكێش دكه‌ت دڤێت هنده‌ك مه‌رج ل ده‌ف هه‌بن ژوان نابیت ل چ سازیێن دى یێن دامه‌زراندى بیت، رێژا وه‌رگرتنا ره‌گه‌زان ژى دێ پێنجى ب پێنجى بیت، هه‌روه‌سا ئه‌و كه‌سێ مه‌رج ژێ دگرن و دهێته وه‌رگرتن بۆ چ سازیێن دى یێن ساخله‌میێ ناهێته ڤه‌گوهاستن و دڤێت ئاكنجیێ ده‌ڤه‌رداریا ئامێدیێ بیت.
رێوار محه‌مه‌د ره‌شید
