پارێزگارێ دهۆكێ دوپاتكر كو تڤێ هه‌لبژاردن ب ره‌نگه‌كێ ئازاد بهێنه ئه‌نجامدان
دهۆك-KDP.info- ئه‌ڤرۆ سپێدێ د. عه‌لى ته‌ته‌ر پارێزگارێ دهۆكێ پێشوازیا شانده‌كێ لیژنا سه‌رپه‌رشتیكرنا هه‌لبژاردنان ل پارێزگه‌ها دهۆكێ كر یێ پێك هاتى ژ (د. فتاح محمد حسین) ئه‌ندامێ جڤاتا كومسیونێ سه‌روكێ لژنێ و (عه‌لى فه‌یسه‌ل ده‌حام) ئه‌میندارێ گشتى یێ جڤاتا كومسیونێ یێ لیژنا سه‌رپه‌رشتیكرنا هه‌لبژاردنان ل پارێزگه‌هێ و (خالد عه‌باس) به‌رپرسێ لقێ دهۆك یێ كومسیونا بلند یا هه‌لبژادنان كر.
دهه‌ڤدیتنه‌كێدا به‌حسێ ره‌وشا پارێزگه‌ها دهۆكێ و به‌رهه‌ڤیێن دهێنه كرن بۆ هه‌وا ئه‌نجامدانا هه‌لبژاردنێن په‌رله‌مانێ كوردستانێ و پێرابونێن ئه‌منى وكارگێرى ل سنورێ پارێزگه‌هێ بۆ سه‌رئێخستنا وێ پروسا دیموكراتى هاته كرن.
نونه‌رێن كومسیونێ خوشحالیا خۆ دیاركر هه‌مبه‌ر وێ هه‌ڤكارى وهاریكاریا هه‌ى دناڤبه‌را لقێ دهۆك یێ كومسیونێ و پارێزگه‌هێ و خواست كو ئاستێ وێ هه‌ڤكاریێ پتر لێ بهێت بۆ وێ یه‌كێ پارێزگه‌ها دهۆكێ هه‌ر بمینیت ل ئاستێ نایاب وه‌كە هه‌لبژاتنێن ساڵێن ده‌ربازبوى كو پاقژترین هه‌وێن هه‌لبژاردنان لێ هاتبوونه ئه‌نجامدان.
پارێزگارێ دهۆكێ خوشحالیا خۆ ب سه‌ره‌دانێ دیاركر و ته‌كه‌زكر كو ل دووڤ راسپاردێن حكومه‌تا هه‌رێما كوردستانێ دڤێت هه‌لبژاردن لدووڤ یاسا و رێنمایێن كومسیونا بلند یا سه‌ربه‌خۆ یا هه‌لبژاردنان ب ره‌نگه‌كێ ئازاد و دیموكراتى بهێنه ئه‌نجامدان و به‌رهه‌ڤیا پارێزگه‌هێ نیشان دا بۆ هه‌ر هاریكاریەكێ كۆ ئه‌ڤ پروسه سه‌ركه‌فتیانه بهێته ئه‌نجامدان.
