سوپارك پرۆنگسورە: ئەو خۆڕاگرییەی کوردان بوو وای کرد پەیوەندییەکان پتەو بکەین
ھەولێر-KDP.info- باڵیۆزی تایلاند لە عێراق دەڵێت: لەڕێگەی فیلمێکەوە زانیم گەلی کورد چەند خۆڕاگرە، هەر ئەو خۆڕاگرییەی کوردان بوو وای کرد بڕیار بدەین پەیوەندییەکان پتەو بکەین و دەست بە ئاڵوگۆڕی بازرگانیی بکەین.
ئه‌مڕۆ پێنجشەممە، کۆڕبەندی بازرگانیی نێوان حکوومەتی هەرێم و ژووری بازرگانی هەولێر و شاندی باڵای بازرگانیی تایلاند لە هەولێر بەڕێوەچوو.
لەمیانی کۆڕبەندەکەدا، سوپارك پرۆنگسورە، "باڵیۆزی تایلاند لە عێراق گوتی: وڵاتەکەمان چاوی لەوەیە پەیوەندییەکانی لەگەڵ هەرێمی کوردستان بەرەو پێشەوە ببات. ئاماژەی بەوەش کرد، "دەیانەوێت خەڵکی هەرێمی کوردستان و تایلاند پێکەوە هەماهەنگیی و ئاڵوگۆڕی بازرگانییان هەبێت". دەشڵێت: هەوڵەکانمان زیاتر دەکەین بۆ قوڵکردنەوەی پەیوەندییەکانمان بۆ بەرژەوەندیی و سوودی هەردوو میللەت.
سوپارك پرۆنگسورە گوتی: "وەکو دەرهێنەرێک دەبینم خەڵکی کوردستان خۆڕاگرن کە لەنێو چەندین ئالەنگارییدان، دەشڵێت: فیلمێک وای لێم کرد بێمە کوردستان بۆ ئەوەی بە یەکەوە کار بکەین.
باڵیۆزی تایلاند لە عێراق دەشڵێت: "دەمەوێت پەیوەندیی و ئاڵوگۆڕیی بازرگانیمان بەرەو پێشەوە ببەین، چەندین دەرفەت هەیە پێکەوە پێشکەشی بکەین و کاری لەسەر بکەین.
