وەزیری بازرگانی بۆ KDP: پارەی جووتیاران بەم زووانە ڕەوانە دەکرێت

ھەولێر-KDP.info- وەزیری بازرگانیی حکوومەتی ھەرێمی کوردستان ڕایگەیاند، لەگەڵ وەزارەتی بازرگانیی حکوومەتی عێراق قسەیان کردووە و کێشەی ناردنی پارەی گەنمی جووتیاران چارەسەر دەبێت و بەم زووانە پارە ڕەوانە دەکرێت.

کەمال موسلیم، تایبه‌ت بۆ ماڵپەڕی فەرمیی پارتی دیموکراتی کوردستان گوتی: "حکوومەتی عێراق بۆ ئەمساڵ لە کڕینی گەنمی جووتیاران پارەی زۆرینەی گەنمی جووتیارانی خۆیانی داوە و تەنیا ھەندێک ناوچەی کوردستانیی وەکو کەرکووک و نەینەوا و تکریتیش ماوە، ئەوەی دیکە ھەموویان دابەش کردووە".

موسلیم گوتیشی: "پارەی گەنمی جووتیارانی ھەرێمی کوردستان زیاتر لە ٥٠٠ ملیار دینار ماوە تاوەکو ئێستا بەغدا ڕەوانەی نەکردووە، ئێمەش وەکو حکوومەت و وەزارەتی بازرگانی لەسەر هێڵین بۆ ئەوەی پارەکە ڕەوانە بکەن، چونکە پێویستە دوای ھەفتەیەک لە ڕادەستکردنی گەنم، پارەی جووتیاران بدرێت".

دەشڵێ: "دەبوو دوای ڕادەستکردنی گەنم پارەکە ڕەوانە بکرێت، وەلێ ئەمجارە حکوومەتی عێراق گەنمێکی زیاتری لەوەی دیاری کرابوو کڕیوە، بەڵام خۆم قسەم لەگەڵ وەزارەتی بازرگانیی عێراق کردووە و بڕیارە لە ماوەیەکی نزیکدا پارەی گەنمی جووتیارانی کوردستان ئەوەی ماوە ڕەوانەی بکەن و ئەو گرفتەش چارە دەکرێت".

لە ئێستادا ساڵانە پلان بۆ کڕینی گەنمی جووتیاران دادەنرێت و بودجەشی بۆ تەرخان دەکرێت و دوای ھەفتەیەک لە ڕادەستکردنی گەنم، پارەی جووتیاران خەرج دەکرێت، بەڵام ئەمساڵ بەغدا سەرەڕای ئەوەی ھەموو گەنمی جووتیارانی ھەرێمی کوردستانی وەرنەگرت، تاوەکو ئێستا زیاتر لە ٥٠٠ ملیار دیناریشی نەناردووە.

 

بڵند ئیبراھیم