عەلی حوسێن: پشتیوانیی خۆمان بۆ نەخۆشخانەی هیوا دووپات دەکەینەوە

سلێمانی-KDP.info- عەلی حوسێن بەرپرسی ڕێکخستنی پارتی دیموکراتی کوردستان  لە سلێمانی و هەڵەبجە، بڕێک دەرمانی پێشکەش بە نەخۆشخانەی هیوا لە سلێمانی کرد و لە کۆنگرەیەکی ڕۆژنامەنووسیدا لە نەخۆشخانەی هیوا گوتی: بەشێک لەو دەرمانانە بە زەحمەت دەستی نەخۆشانی شێرپەنجە دەکەوێت.

عەلی حوسێن لە کۆنگرەیەکی ڕۆژنامەنووسیدا لە نەخۆشخانەی هیوا گوتی: بە پێویستمان زانی سەردانی ئەو نەخۆشخانەیە بکەین و هاوکارییان بکەین و پشتیوانیی خۆمانیان بۆ دووپات بکەینەوە، دکتۆر و کارمەندەکانی ئەم نەخۆشخانە دەستییان لە خزمەتکردنی نەخۆشانی شێرپەنجە لە شارەکە دیارە. گوتیشی: بە توانای خۆمان و هاوکاریی دڵسۆزان، بە ئەرکی خۆمان زانی هاوکاریی ئەو نەخۆشخانەیە بکەین کە خزمەتی نەخۆشانی شێرپەنجە دەکات، دەڵێت: هەندێک لەو دەرمانانەی هێناومانە بۆ نەخۆشخانەکە، بە زەحمەت دەست دەکەوێت.

دواتر هەر لەو کۆنگرە ڕۆژنامەنووسیەدا، دکتۆر یاد نەقشبەندی بەڕێوەبەری نەخۆشخانەی هیوا، ستایشی ڕێکخستنی پارتی کرد لە سلێمانی و هەڵەبجە بۆ هاوکاریی و پاڵپشتییان، ئاماژەی بەوەش کرد کە، نەخۆشخانەی هیوا خزمەتی نەخۆشانی عێراق بەگشتیی دەکات، بۆیە پێویستە هەمووان پشتیوانیی بکەن.