نێچیرڤان بارزانى پیرۆزبایى له یه‌كێتیى نیشتمانیى كوردستان ده‌كات
ھەولێر-KDP.info- نێچیرڤان بارزانى سەرۆکی ھەرێمی کوردستان، پەیامێکی پیرۆزبایى ئاراستەی یه‌كێتیى نیشتمانیى كوردستان کرد کە ئەمە دەقەکەیەتی:
به‌ڕێز بافڵ جه‌لال تاڵه‌بانى
سه‌رۆكى یه‌كێتیى نیشتمانیى كوردستان
سڵاو و ڕێز..
یادى (49) ساڵه‌ى دامه‌زراندنى یه‌كێتیى نیشتمانیى كوردستان به گه‌رمى له به‌ڕێزتان و مه‌كته‌بى سیاسى و سه‌ركردایه‌تى و ئەنجومەنی پاراستنی بەرژەوەندییە باڵاکانی یەکێتیی نیشتمانیی کوردستان و ته‌واوى ئه‌ندامان و لایه‌نگران و جه‌ماوه‌رى یه‌كێتى پیرۆز ده‌كه‌م، هیواى سه‌ركه‌وتن و پێشكه‌وتنى به‌رده‌وامتان بۆ ده‌خوازم.
له‌م یاده‌دا به ڕێزه‌وه دامه‌زرێنه‌رى یه‌كێتى، خوالێخۆشبوو سه‌رۆك مام جه‌لال و هه‌موو ئه‌و تێكۆشه‌رانه به بیر ده‌هێنینه‌وه كه له‌پێناو ئازادیى كوردستان له ڕیزه‌كانى یه‌كێتیى نیشتمانیى كوردستاندا، خه‌باتیان كردووه و ده‌كه‌ن. مێژووى خه‌بات و تێكۆشانى یه‌كێتى به‌رز هه‌ڵده‌سه‌نگێنین.
هه‌ر به‌م بۆنه‌یه‌وه جه‌خت له ئاماده‌یى و ڕۆڵى گرنگى به‌ڕێزتان و یه‌كێتیى نیشتمانیى كوردستان له پرۆسه‌ى سیاسیى عێراق و هه‌رێمى كوردستاندا ده‌كه‌ینه‌وه. هیوادارین ئه‌م یاده ببێته هانده‌رى لێكگه‌یشتن و ته‌بایى و پێكه‌وه‌ییى لایه‌نه سیاسییه‌كان له‌پێناو پاراستنى قه‌واره‌ى فیدراڵى و مافه ده‌ستوورییه‌كانى هه‌رێمى كوردستاندا.
هه‌ر سه‌ركه‌وتوو بن.
نێچیرڤان بارزانى
سه‌رۆكى هه‌رێمى كوردستان
2024/6/1
