فەرماندەی هێزەکانی پشتیوانیی یەک پێشوازی لە وەفدێکی باڵای سەربازیی ئەمریکا کرد
ھەولێر-KDP.info- فەریق سیهاد بارزانی، فەرماندەی فەرماندەیی هێزەکانی پشتیوانیی یەک، پێشوازی لە کۆڵۆنێڵ مایکڵ گەچێرۆ، ڕاوێژکاری باڵای سەربازی لە کونسولخانەی ویلایەتە یەکگرتووەکانی ئەمه‌ریکا لە کوردستان و شاندێکی یاوەری كرد.
لە دیدارێکدا باس لە پەیوەندییەکانی نێوان هەردوولا و هاوکاری و هەماهەنگییەکانی هاوپەیمانان بۆ هێزەکانی پێشمەرگە کرا.
دواتر شاندی میوان سەردانی مۆزەخانەی فەرماندەیی هێزەکانی (پشتیوانیی یەک)یان کرد، کە تایبەتە بە کەلوپەل و تەقەمەنی و بۆمبە چێنراوەکان و چەندین جۆری چەکی گرانی تیرۆرستانی داعش، کە سەرجەمیان لەلایەن کەتیبەی ئەندازەی سەربازی سەر بە فەرماندەیی هێزەکانی پشتیوانیی یەک، لە ماوەی شەڕی تیرۆرستانی داعش پوچەڵکراونەته‌وە.
شایانی باسە تیرۆریستانی داعش ئەو بۆمب و تەقینەوانەیان بۆ مەبەستی زیانگەیاندن بە هێزەکانی پێشمەرگە و ڕێگریکردن لە بەرەوپێشچوونەکانی پێشمەرگە بەکاردەهێنا.
لای خۆیەوە ڕاوێژکاری باڵای سەربازیی کونسولخانەی ئەمه‌ریکا، دەستخۆشی لە فەرماندەیی هێزەکانی پشتیوانیی یەک کرد و بە کارێکی گرنگ و مەزنیان زانی بۆ پاراستنی گیانی هێزەکانی پێشمەرگە و خەڵکی سڤیل لە بەرەکانی شەڕ.
دواتر فیلمێکی دۆكیۆمێنتاری پەخش کرا، کە تایبەت بوو بە کار و چالاکییەکانی کەتیبەی ئەندازەی سەربازی سەر بە فەرماندەیی هێزەکانی پشتیوانیی یەک لە ماوەی شەڕی تیرۆریستانی داعشدا، کە تیایدا چۆنییەتی پوچەڵکردنەوەی بۆمبە چێنراوەکان و پاککردنەوەی تونێل و خانوو و ئۆتۆمبێلە بۆمبڕێژکراوەکان نمایش کران.
