پەیاما سەرۆك بارزانی بۆ سالیادا دامەزراندنا بنگەهێ لالش

هه‌ولێر-KDP.info- سەرۆك بارزانی بەبۆنەی 31 ساڵەی دامەزراندنی بنكەی لالش پەیامێكی بڵاو كردەوە و تێیدا پیرۆزبایی لە ئەندام و كادیرانی بنكەكە و تەواوی خوشك و برایانی ئێزیدی كرد.

سەرۆك بارزانی لە پەیامەكەدا رایگەیاند: بنكەی لالش لە ماوەی ساڵانی رابردوودا سەرەڕای كۆسپ و ئاستەنگەكان، خزمەتێكی بەرچاوی پێشكەش بە كولتووری گەلی كوردستان و پاراستنی نەریتەكانی جڤاكا ئێزیدییان كردووە.

دەقی پەیامەكەی سەرۆك بارزانی بەبۆنەی 31 ساڵەی دامەزراندنی بنكەی لالش:

بناڤێ خودایێ مەزن و دلۆڤان

بەرێزان سەرۆک و ئەندامێن دەستەیا بلندا بنگەهێ لالش

ب هەلکەفتا سیهوئێك ساڵیا دامەزراندنا بنگەهێ لالش پیرۆزباهیێن خۆ ئاراستەی ھەوەیێن بەرێز و ئەندام و کادرێن بنگەهێ لالش و هەموو خوشک و برایێن ئێزدی دکەم. بنگەهێ لالش د سالێن بووریدا دگه‌ل هه‌مى كۆسپ و ئاسته‌نگیان، ب هه‌ولا خەمخۆر و كادر و ڕەوشەنبیرێت جڤاكا ئێزدی، خزمەتەكا بەرچاڤ پێشكەشی كولتوورێ گەلێ كوردستانێ و پاراستنا نەریتێت جڤاكا ئێزدیان كریە.

پشتەڤانیێ ل بزاڤ و ماندیبوونا بنگەهێ دکەم و هیڤییا بەردەوامیێ و پێشکەفتنێ بۆ هەوە و هیڤییا ئارامی و خۆشیێ بۆ هەموو خوشک و برایێن ئێزدی دخوازم و هەر سەرکەفتی بن.

بمینن دخێر و خۆشیاندا

 

مسعود بارزانی

11ی ئایارا 2024