فارس عیسا بۆ KDP: ھەرێم و بەغدا جددین بۆ چارەسەر كردنی کێشەکان

بەغدا-KDP.info- سەرۆکی نوێنەرایەتی حکوومەتی ھەرێمی کوردستان لە بەغدا گوتی، گفتووگۆ لە نێوان ھەردوو حکوومەتی ھەرێمی کوردستان و عێراق بەسەرپەرشتی سەرۆکی حکوومەتی ھەرێمی کوردستان و عێراق بەردەوامە لە بارەی چەندین پرس و ھەردوولا جددین بۆ ئەوەی کێشەکانی نێوان ھەردوولا لە ھەموو بوارەکاندا چارەسەر بکرێن.

فارس عیسا، سەرۆکی نوێنەرایەتی حکوومەتی ھەرێمی کوردستان لە بەغدا، بۆ ماڵپەڕی فەرمیی پارتی دیموکراتی کوردستان گوتی: "تاوەکو ئێستا سەرجەم کێشەکانی نێوان ھەرێمی کوردستان و عێراق چارەسەر نەکراون و کۆمەڵێک کێشەی جۆراوجۆرن و سەرۆکی حکوومەتیش بەردەوام لەگەڵ بەغدا لەسەر خەتە بۆ ئەوەی کێشەکان چارەسەر بکرێت بەھەمان شێوە ھەڵوێستی حکوومەتی عێراقیش بەتایبەت سەرۆکوەزیرانی عێراق محەممەد شیاع سودانی ئەویش پێی خۆشە کێشەکان چارەسەر بکرێن و ھەڵوێستەکانی ئیجابین، بۆیە ھەردوولا جددین بۆ ئەوەی سەرجەم کێشەکان چارەسەر بکرێن لە ھەموو بوارەکاندا".

فارس عیسا گوتیشی: "ئەو پرسانەی ماون گفتووگۆی لەسەر دەکرێت بۆ ئەوەی چارەسەر بکرێن لەگەڵ بەغدا، لەوانەش کێشەی دارایی و ئەمنی و ناوچە کوردستانیەکانی دەرەوەی ھەرێمی کوردستان، بۆیە کۆمەڵێک پرسن و گفتووگۆی بەردەوامی لەسەر دەکرێت بۆ ئەوەی بتواندرێت سەرجەمیان چارەسەر بکرێت".

ھاوکات جەختیش دەکاتەوە، کە سەرۆکی حکوومەتی ھەرێمی کوردستان دەیەوێت بەپێی دەستوور سەرجەم کێشەکان لەگەڵ بەغدا چارەسەر بکات.

 

بڵند ئیبراھیم