زاخۆ..بهایێن هەمی نەخۆشخانەیێن نەحکومی و ٢٠ مارکێتان هاتنە داشکاندن

ل سەر ڕاسپاردێن گوهدار شێخۆ، سەرپەرشتێ ئیدارا سەربەخۆ یا زاخۆ، و ب هەلکەڤتا هاتنا هەیڤا رەمەزانێ، بریار ل سەر داشکاندنا بهایێن هەمی (کلینیکێن نۆژداران، تاقیگەهێن پزیشکی، دەرمانخانە، هەمی جورێن تیشکان)، ل نەخوشخانەیێن نەحکومی ل سنوورێ ئیدارا سەربەخۆ یا زاخۆ هاتنە کێمکرن،

و ب هندێ هەمی پلێتێن نوژداران ل کلینیکان دێ بنە ١٠،٠٠٠ دینارێن عیراقی بۆ هەر نەخۆشەکێ، و ٢٥٪ دێ داشکاندن کەڤیتە سەر کوژمێ گشتی ل تاقیگەهێن پزیشکی بۆ هەر نەخۆشەکێ، و ٢٠٪ دێ داشکاندن کەڤیتە سەر کوژمێ گشتی ل کلینیکێن ددانان بۆ هەر نەخۆشەکێ، هەروەسا ١٥٪ داشکاندن دێ کەڤیتە سەر بهایێن نشتەگەریێن مەزن و ١٥٪ ژی ل سەر بهایێن نشتەگەریێن بچویک بۆ هەر نەخۆشەکێ،

شڤان عەبدی، رێڤەبەرێ راگەهاندنا ئیدارا سەربەخۆ یا زاخۆ بۆ مالپەرێ فەرمی یێ پارتی دیموکراتی کوردستان دووپات دکەت کو ئەڤ داشکاندنە ل سەر نەخۆشخانەیێن نەحکومی یێن کەرتێ تایبەت هاتینە کرن، چونکە بهایێن نەخۆشخانەیێن حکومی گونجایترن بۆ هەمی وەڵاتییان ب بەردەوامییا ساڵێ، دیسان داشکاندنێن وان پێدڤی ب بریارا وەزارەتێ و نەنجومەنێ وەزیران هەیە.

هەر ب ڤێ هەلکەفتێ ئیدارا سەربەخۆ یا زاخۆ بۆ پتری ٢٠ مارکتێن مەزن یێن ئاهێن خوارنێ و گوشتفرۆشان بریارا داشکاندنێ ب ٢٠٪ ل سەر بهایێن کەل و پەلێن خوارنێ داییە، بۆ زانین ئەو مارکێت و جه ب شێوەیەک وەسا هاتینە هەلبژاردن کو ل هەمی تاخێن زاخۆ هاتبنە دابەشکرن بۆ هندێ خەلک ل سەر ئاستێ ئیدارا سەربەخۆ یا زاخۆ ب گشتی مفایی ژڤێ بریارێ ببینیت و نەچار نەبیت بۆ چوونا جهەکێ دویر ژماڵا خۆ یان بێ بەهر بیت.

ژبلی وان بریاران، و ژبەرکو زاخۆ ب باژێرێ مێهڤانداری و مەردینی ب ناڤ و دەنگە، رۆژانە دێ ل پارکا شەهیدان ل سەنتەرێ باژێرێ زاخۆ دناڤا بازارێ گشتی دا، خوارنا فتارێ دێ هێتە ئامادەکرن ژبۆ هەر ڕێڤنگەکێ و هەر کەسەکێ حەز بکەت فتارێ ب کومی بخۆت، و دهێتە زانین ئەڤ کارێ خێرخوازی ژلایێ کۆمپانییا ئالتۆنسا ب هەماهەنگی دگەل ئیدارا سەربەخۆ یا زاخۆ دا هاتییە کرن.

 

سەجا شێرزاد-دهۆک