یەکێتی ئەوروپا لە پشتگیریکردنی ھەرێمی کوردستان بەردەوام دەبن
یەکێتی ئەورپا _KDP.info_ نوێنەری حکوومەتی ھەرێمی کوردستان لە یەکێتی ئەوروپا گوتی: وەکو نوێنەرایەتی حکوومەتی ھەرێمی کوردستان دەستمان بە جەولەیەکی سەردان کردووە بۆ گەیاندنی پەیامی حکوومەتی ھەرێمی کوردستان بە یەکێتی ئەوروپا، ئەوانیش ھەڵوێستیان ئەرێنییە و پشتگیری ھەرێمی کوردستان دەکەن.
دکتۆر دلاوەر ئاژگەیی، نوێنەری حکوومەتی ھەرێمی کوردستان لە یەکێتی ئەوروپا، بۆ ماڵپەڕی فەرمیی پارتی دیموکراتی کوردستان گوتی: لە بەردەوامی کار و چاڵاکییەکانی نوێنەرایەتی ئێمە لە یەکێتی ئەوروپا چەندین سەردانمان ئەنجامداوە، بۆ ئۆفیسی سیاسەتی دەرەوە و ئاسایشی یەکێتی ئەوروپا، چەندین پرسی سیاسی و ئەمنی پەیوەست بە ھەرێمی کوردستان و عێراقمان تاوتوێکرد، لەوانە پرسی لاوازکردنی سیستەمی فیدراڵی و ئەو ھەوڵ و ڕێکارە سیاسی و ئابووری و ئەمنییانەی بە مەبەستی لاوازکردنی ھەرێمی کوردستان لە ئارادان، بۆیە داوامان لە یەکێتی ئەوروپا کرد پشتگیری ھەرێمی کوردستان بکەن.
دکتۆر دلاوەر ئاژگەیی گوتیشی: چەند پرسێکی دیکەشمان باس کرد، لەوانە پێکەوەژیانی ھەرێم و نەمانی سیستەمی کۆتا بۆ پێکھاتەکان لەلایەن دادگای فیدراڵی، بۆیە یەکێتی ئەوروپا پشتگیری خۆی بۆ ھەرێمی کوردستان دووپات کردەوە .
ئاژگەیی باسی گوتیشی: لە سەردانەکان بەردەوام دەبین، زیاتر مەبەستمانە بارودۆخەکە لە تێڕوانینی حکوومەتی ھەرێمی کوردستان و کاریگەرییان لەسەر پرۆسەی سیاسی و دیموکراسی و سیستەمی فیدراڵی بۆ بخەینەڕوو، بۆیە داوامان کرد یەکێتی ئەوروپا پشتگیری لە ھەرێمی کوردستان بکات، ھەڵوێستی ئەوانیش ئەرێنی بوو.
بڵند ئیبراھیم
