د.رەوان سوبحی: هه‌بوونا مالپه‌رێ فه‌رمى یێ پارتى دیموكراتى كوردستان ب پێنگاڤه‌ك باش دبینم و بوویە جهێ باوه‌ریێ
ددیدارەکا رۆژنامەڤانی دا دگەل د.رەوان سوبحی، دکتورا دبوارێ راگەهاندنێ دا و ماموستایێ زانکویێ، سەبارەت ب گرنگییا هەبوونا مالپەرێ پارتی دیموکراتی کوردستان وەکو دەزگەهەک راگەهاندنێ یێ سەردەمانە و گرنگییا هەبوونا وی بۆ دەزگەهێن راگەهاندنێ و جەماوەری.
١- گرنگییا هەبوونا مالپەرێ فەرمی یێ پارتی دیموکراتی کوردستان وەکو دەزگەهەک راگەهاندنێ؟
هه‌بوونا مالپه‌رێ فه‌رمى یێ پارتى دیموكراتى كوردستان ب پێنگاڤه‌ك باش دبینم، ژبه‌ر كو قوناغێن گه‌هاندنا په‌یامێ هاتینه گوهۆڕین، به‌لكو به‌رى نوكه ب رێیا رۆژنامه و كوڤار و تله‌فزیونێ زێده‌تر پارت و لایه‌نان په‌یامێن خوه گه‌هاندنه لایه‌نگر و جه‌ماوه‌ر و خوانده‌ڤان و بینه‌رى، به‌لێ پشتى په‌یدابوونا ئینته‌رنێتێ و ب تایبه‌ت ژى به‌رده‌ستبوونا پلاتفورمێن سوشیال میدیایێ، بوو ئه‌گه‌ر كو ده‌وله‌ت و پارت و لایه‌نێن جودا جودا زێده‌تر گرنگیێ ب سۆشیال میدیایێ بده‌ن ، ژبه‌ر كو گه‌هشتیه وى راده‌ى كو د ناڤ جڤاكى دا هه‌مى بووینه خودان كه‌نالێن سه‌ربخو و ل ناڤ تۆره‌كا به‌رفره‌هـ پێزانینان لێك دگوهۆڕن، له‌ومان ژى ئه‌گه‌ر جاران ب ڕاگه‌هاندنێ دگۆتن ده‌ستهه‌لاتا چوارێ، ئه‌ڤ رسته‌یه دده‌مه‌كێ دا بوو كو هێشتا سۆشیال میدیا په‌یدا نه‌ببوو، به‌لكو راگه‌هاندن ل چه‌ند كه‌نالێن دیاركرى پێكهاتبوو، ئانكو سازى و گرۆپ و كۆمپانیان برێڤه دبرن و ئاراسته دكرن، تاكى چ رۆله‌كێ سه‌ره‌كى تێدا نه‌دگێرا، به‌لێ ئه‌ڤرۆ ل سایا سۆشیال میدیایێ ره‌وش هاتیه گوهۆرین، تاك نوكه دشێت چه‌ندین كه‌نالان برێڤه ببه‌ت و ئاراسته بكه‌ت، به‌رى په‌یدابوونا سۆشیال میدیایێ ئه‌وێن په‌یام دگه‌هشتێ پشكه‌كا دیاریكرى بوون ژ جڤاكى، به‌لێ نوكه دشێین بێژن په‌یام دگه‌هیته هه‌مى جڤاكى، له‌وما هه‌ژموونا سوشیال میدیایێ زێده‌بوویه دڤێت پارتى ژى خوه ل گه‌ل بگۆنجینیت ژبه‌ر كو داتایێن بكارهینه‌رێن سوشیال میدیایێ دسه‌رنج راكێشن، سالانه ب ملیونه‌ها بكارهینه‌ر زێده دبن و ل ئیراقێ زێده‌تر ژ 31 ملیون بكارهێنه‌ر هه‌نه و ژسه‌رجه‌مێ روونشتڤانێن ئیراقێ ب رێژا 69% بكار دئینن.
٢- گرنگییا هەبوونا مالپەرێ فەرمی یێ پارتی دیموکراتی کوردستان ژبۆ دەزگەهێن راگەهاندنێ؟
بێگومان مه‌ره‌م ژ دامه‌زراندنا مالپه‌رێ فه‌رمى یێ پارتى بۆ هندێ یه كو ببیته ژێده‌رێ ئێكێ یێ شروڤه‌كرن و دانا په‌یامێن پارتى بۆ ده‌زگه‌هێن وێ یێن راگه‌هاندنێ، لێ ب بۆچوونا من ب ره‌نگه‌كێ گشتى مالپەر زێدەتر پێدڤی ب کاری یە ژبۆ پتر پێشڤەچوونێ وەک زێدەکرنا بەڵاڤکرنا ڤیدیویان و دروستکرنا دیدارێن رۆژنامەڤانی دگەل سەرکرداتییا پارتی.
٣- مالپەرێ فەرمی یێ پارتی دیموکراتی کوردستان چەند بوویە جهێ باوەریا خەلکێ؟
مالپه‌رێ پارتى جهێ باوه‌ریێ یه ژبه‌ر كو تاكو په‌یامه‌ك به‌لاڤ دبیت دگه‌له‌ك فلته‌ران را ده‌رباز دبیت تاكو دگه‌هیته خوانده‌ڤانى، به‌روڤاژى په‌یامێن گه‌له‌ك سۆشیال میدیایێ كو بێى هه‌ست كرن ب به‌رپرسیاره‌تیێ و زانینا ئه‌گه‌رێن دروست یێن روودانان، په‌یامان به‌لاڤ دکن، كو دبیته ئه‌گه‌ر ل به‌ر خوانده‌ڤان به‌رزه دبیت، مالپه‌رێ پارتی ئه‌و هه‌ڤسنگیه پاراستى یه كو بێى ژێده‌ر چ په‌یامه‌كێ به‌لاڤ نه‌كه‌ت كو ئه‌ڤه‌ژى خاله‌كا باشه كو خوانده‌ڤانان ل خوه خرڤه دكه‌ت.
سەجا شێرزاد-دهۆک
