ئەو پڕۆژەیەی سەرۆکی حکوومەت لە ھەڵەبجە بەردی بناغەی بۆ دانا دەست بە جێبەجێکردنی دەکرێت

ھەولێر _KDP.info_  بریکاری  وەزارەتی  ئاوەدانکردنەوەی حکوومەتی ھەرێمی  کوردستان  گوتی: دوای ئەوەی  سەرۆکی حکوومەتی ھەرێمی کوردستان بەردی بناغەی پڕۆژەی ڕێگای (ھەڵەبجە _ توەقو)ی دانا، ھەموو ڕێکارەکانی جێبەجێکردنی پڕۆژەکە تەواو بوونە و دراوەتە دوو کۆمپانیا و پێویستە دەست بە جێبەجێکردنی بکەن.

بریکاری  وەزارەتی ئاوەدانکردنەوەی حکوومەتی  ھەرێمی کوردستان، دکتۆر ئاگرین عەبدوڵا، بۆ ماڵپەڕی فەرمیی پارتی دیموکراتی کوردستان گوتی: ئەو ڕێگایەی سەرۆکی حکوومەتی ھەرێمی کوردستان بەردی بناغەی بۆ دانا ڕێگای (هەڵەبجە _ توەقوت _ گلیجە)یە و پردێکیشی تێدایە، دراوەتە دوو کۆمپانیا و پێویستە دەست بە جێبەجێکردنی پڕۆژەکە بکەن، ڕێگایەکی گرنگ و ستراتیژییە و گوژمەی تەرخانکراویش بۆ پڕۆژەکە ٣٠ ملیار دینارە.
دکتۆر  ئاگرین  عەبدوڵا  گوتیشی: جێبەجێکردنی  ئەو پڕۆژەیە بۆ ھەڵەبجە و خەڵکی ھەڵەبجە زۆر گرنگە،  دەیان گوند دەکەونە سەر ئەو ڕێگایە و پارێزگای ھەڵەبجەش بە ئیدارەی سەربەخۆی گەرمیانەوە دەبەستێتەوە، بۆیە ڕێگایەکە گرنگی زۆری ھەیە و بە تەواوکردنی خزمەتێکی باشی خەڵکی ھەڵەبجە دەکات.
عەبدوڵا ڕوونیشی کردەوە: خۆی ڕێکارەکانی جێبەجێکردنی پڕۆژەکە ھەمووی تەواو بووە و تەنیا ماوە کۆمپانیاکان دەست  بە جێبەجێکردنی پڕۆژەکە بکەن،  چونکە سەرۆکی حکوومەت بەردی بناغەی بۆ  داناوە، تەنیا ئەوە دەمینێت دەست بەکارکردن و جێبەجێکردنی بکرێت.

بڵند ئیبراھیم