شیفا بارزانی، سڵاوی سەرۆك بارزانی گەیاندە ئامادەبووان

ھەولێر-KDP.info- کۆبوونەوەی رەوەندی کوردستانی لە شاری ئەدمنتۆن، لە هەرێمی "ئەلبەرتا"ی کەنەدا لەگەڵ چالاکوانی سیاسی و ژمارەیەک پەرلەمانتاری کەنەدا بە ئامادەبوونی شیفا بارزانی، بەرپرسی رەوەندی کوردستانی لە دەرەوە بەڕێوەچوو. 

لە کۆبوونەوەکەدا هەردوو پەرلەمانتار زیاد ئەبوتەیف، تۆم كەمیج و رەحیم رەشیدی، کە نوێنەری كۆنفدراسیۆنی رەوەندی كوردستانییە لە ئەمەریكا و كەنەدا، قسەیان کرد و ڕۆڵی رەوەندی كوردستانیان بەرزنرخاند.

شیفا بارزانی لە دیدارەکەدا گوتارێکی پێشکەشکرد، سڵاوی سەرۆك بارزانی گەیاندە ئامادەبووان و تیشکی خستە سەر هەلومەرجی کوردستان و هەروەها پێکەوەکارکردنی کوردستانیان لە دەرەوە.  شیفا بارزانی لە ناوەڕۆکی قسەکانیدا باسی لە  بارودۆخی ئێستای ناوچەکە کرد و بە پێویستی زانی کوردستانیان لە دەرەوە لە دەرەوەی بازنەی حیزبایەتی تێکۆشانی خۆیان گەشە پێبدەن.

لە کۆبوونەوەکەدا کوردستانیانی هەرچوار بەشی وڵات، وێرای پێکهاتە جۆراوجۆرەکانی، ئامادەبوون و  دید و بۆچوونی خۆیان  هێنایە زمان و بە گەرمی پێشوازیان لە قسەکانی کرد. ڕێژەی بەشداری ژنان و گەنجان لە دیارترین بابەتەكانی ئەو كۆبوونەوە بوو.

كوردستانیان بە پێداگرییەوە  باسیان لەوە  كرد كە بۆ یەكەم جارە  كۆبوونەوەی  دوور لە حیزبایەتی و بە نەفەسی كوردستانی دێتە ڕۆژەڤەوە و داوایان كرد ئەم دیاردە زیاتر پەرەی پێبدرێت.