پەیامی پیرۆزبایی مەکتەبی سیاسی پارتی بە بۆنەی (٣٠)ەمین ساڵیادی دامەزراندنی یەکگرتووی ئیسلامی کوردستان

ھەولێر-KDP.info- بە بۆنەی (٣٠)ەمین ساڵیادی دامەزراندنی یەکگرتووی ئیسلامی کوردستانەوە، مەکتەبی سیاسیی پارتی دیموکراتی کوردستان، پەیامێکی پیرۆزبایی ئاراستەی ئەمینداری گشتی یەکگرتوو و ئەندامانی ئەنجوومەنی جێبەجێکردن و سەرکردایەتی یەکگرتووی ئیسلامی کوردستان کرد.

بەڕێز/ مامۆستا سەڵاحەدین بەھائەدین ئەمینداری گشتی یەکگرتووی ئیسلامی کوردستان

بەڕێزان/ ئەندامانی ئەنجوومەنی جێبەجێکردن و سەرکردایەتی یەکگرتووی ئیسلامی کوردستان

بەبۆنەی (٣٠)ەمین ساڵیادی دامەزراندنی یەکگرتووی ئیسلامی کوردستان، گەرمترین پیرۆزبایی لە ئێوەی بەڕێز و سەرکردایەتی و سەرجەم کادیر و ئەندام و لایەنگرانی حزبەکەتان دەکەین و، ئومێدەوارین ھەمیشە لە پێشکەوتن دابن و  ھەنگاوی باشتر بنێن بۆ بەدیھێنانی مافە ڕەواکانی گەلەکەمان.

ئەو یادە بە دەرفەت دەزانین دووبارە جەخت بکەینەوە سەر پتەوکردنی ھەماھەنگی و ھاوڕیزی نێوانمان و سەرجەم ھێز و لایەنە سیاسییەکانی کوردستان، ھەروەھا پێویستە بە ھەموو لایەک بەوپەڕی بەرپرسیارەتییەوە کار لەسەر پرسە نەتەوەیی و نیشتیمانییەکان بکەین لە پێناو بەرژەوەندییە باڵاکانی گەل و وڵاتەکەمان.

 

دووبارە پیرۆزباییتان لێدەکەین..ھەر سەرکەوتوو بن..

 

مەکتەبی سیاسیی پارتی دیموکراتی کوردستان

٦ی شوباتی ٢٠٢٤