لە زاخۆ ٤٢ پڕۆژەی وەبەرھێنان پەسەندکران

لە ئیدارەی سەربەخۆی زاخۆ ١١٣ پڕۆپۆزەل پێشکەش بە وەبەرھێنان کراون و بەڕێوەبەری گشتی وەبەرھێنانی ئیدارەکەش دەڵێ: لەو ژمارەیە ٤٢ پڕۆژەی وەبەرھێنان بەسەرمایەی ٣٦٢ملیۆن دۆلار  پەسەندکراون، پڕۆژەی ئیماراتیش بەرەو تەواوبوونە و چەندین ھەلیکار دەڕەخسێنێ. 

 

جەگەرخوین تاھر، بەڕێوەبەری گشتی وەبەرھێنانی زاخۆ بە ماڵپەڕی فەرمیی پارتی دیموکراتی کوردستانی ڕاگەیاند:  پڕۆژەی ئیماراتی لە ئیدارەی زاخۆ جێبەجێ دەکرێت، ٧٥%ی پڕۆژەکە تەواوبووە و چەند بەشێک لەخۆ دەگرێت، پڕۆژەکە کشتوکاڵییە و پێشبینی دەکەین لە ئایندەیەکی نزیکدا پڕۆژەکە تەواوبکرێت، ئێستا تەنیا دروستکردنی سەنتەری لێکۆڵینەوەی ماوە بۆی زیاد بکرێت. 

 

بەڕێوەبەری گشتی وەبەرھێنانی ئیدارەی سەربەخۆی زاخۆ دەڵێت:  پڕۆژەکە دەرفەتی کار بۆ ھاووڵاتییان دەڕەخسێنێت، ڕاستە دەرفەتی کاریان زیاتر وەرزییە، بەڵام بەشێوەیەکی گشتی دوو ھەزار و ٥٠٠ ھەلیکار دەڕەخسێنێ بۆ ھاووڵاتییانی زاخۆ. 

 

جەگەرخوین تاھر ئاماژەی بۆ ئەوە کرد: ئێستا ١١٣ پرۆپۆزەل لەبەردەستی ئێمەدان کە لەلایەن وەبەرھێنەران پێشکەشکراون، لەو ژمارەیەش دوای پێداچوونەوە ٤٢ پڕۆژە پەسەندکراون بەسەرمایەی ٣٦٢ملیۆن دۆلار، ئەوانەش لەکاتی پێدانی مۆڵەت دەچنە بواری جێبەجێکردن و کاریگەرییان لەسەر کەرتی وەبەرھێنان دەبێت لە ئیدارەی سەربەخۆی زاخۆ. 

 

قائید میرۆ