وەزارەتی ئاوەدانکردنەوە: لە ھەموو شوێنەکان تیممان ئامادەن و ڕێگە نادەن ئاستەنگی ھاتوچۆ دروست بێت

ھەولێر _KDP.info_ بریکاری وەزارەتی ئاوەدانکردنەوەی حکوومەتی ھەرێمی کوردستان گوتی: لە ھەموو پارێزگا و ئیدارە سەربەخۆکان تیمی ڕاماڵینی بەفر ئامادەن و لە ھیچ شوێنێک ڕێگە نادەن ئاستەنگی ھاتوچۆ دروستبێت، بۆیە ھیوادارین گەشتیار و خەڵکیش بەبێ ئاگاداری سەردانی ھەندێک ناوچە نەکەن کە تووشی گرفت ببن.

بریکاری وەزارەتی ئاوەدانکردنەوەی حکوومەتی ھەرێمی کوردستان، دکتۆر ئاگرین عەبدوڵا، بۆ ماڵپەڕی فەرمیی پارتی دیموکراتی کوردستان گوتی:  شەپۆڵێکی بەفر و باران ھەرێمی کوردستانی گرتووەتەوە، تیمەکانی ئێمەیش لە ئامادەباشی تەواودان و بەردەوامن لە ڕاماڵین و کردنەوەی ڕێگاکان لە ناوچەکانی مێرگەسۆر، سیدەکان، باڵەکایەتی، حاجی ئۆمەران و چۆمان، لە سنووری سلێمانیش لە شارباژێڕ و پێنجوێن بەردەوامن لە ڕاماڵینی بەفر، لە سنووری دھۆکیش لە ئامێدی و کانی ماسێ ئەو شوێنانەی بەفر گرتوویەتییەوە دەکرێنەوە، بۆیە ھەر ڕێگایەک بگیرێت لە ماوەیەکی کەمدا دەکرێتەوە و ڕێگە نەدراوە ئاستەنگ بۆ ھاتوچۆ دروست ببێت، بۆیە تیمەکان لە ئامادەباشی تەواودان و بودجەشمان بۆ دابین کردوون.

لەبارەی ژمارەی تیمەکانیش، دکتۆر ئاگرین عەبدوڵا گوتی: لە ئیدارەی سەربەخۆی سۆران چوار تیم ھەن، لە ھەولێر دووتیم ھەیە و لە دھۆک زیاتر لە پێنج تیم ھەیە، لە سنووری سلێمانیش نزیکەی پێنج تیم ھەیە، تیمەکانمان و لەھەر شوێنک گرفت ھەبێت چارەی دەکەن.

دەشڵێت: بەداخەوە زۆر جار دوور لە ڕێنماییەکانی ئێمە گەشتیاران سەردانی ھەندێک شوێن دەکەن کە ئێمە ئاگادار نین، بۆ نموونە باس لە چوون بۆ چیای سەفین و گارە دەکەین، تا دۆخی کەشوهەوا ئاسایی نەبێتەوە نابێت ئەوان بەبێ ئاگاداری لایەنی پەیوەندیدار سەردان بکەن، ئەگەر نا گرفتیان بۆ دروست دەبێت، بۆیە پێویستە بەپێی ڕێنماییەکان سەردانەکان ئەنجام بدەن.

بڵند ئیبراھیم