تیمێن راكرنا مینان ل پارێزگه‌ها دهۆكێ رێژا هه‌ره مه‌زن یا پاقژكرنا زه‌ڤیان ل سه‌ر ئاستێ هه‌رێمێ ب ده‌ستخۆڤه ئینایه
یه‌كه‌مین رێڤه‌به‌رییه, كو هه‌تا ئه‌ڤرۆ ژى, شه‌رى به‌رامبه‌ر هێزێن حزبا به‌عس (حكومه‌تا عیراقێ یا به‌رێ ب سه‌روكاتییا سه‌دام حوسێنى) دكه‌تن, پیشه‌گه‌رێن وێ به‌رامبه‌ر دوژمنه‌كێ ڤه‌شارتى كاردكه‌ن ئه‌و ژى (مین و ته‌قه‌مه‌نى نه) و ب بورینا ساڵان ئه‌و دوژمن ژكارناكه‌ڤن, و هه‌ر ر‌وژه‌كا مین لابه‌ر به‌ره‌ف كارى دچن, ل ژڤانێ ڤه‌گه‌راندنێ بۆ ناڤ ماڵ و خێزانێن خۆ نینن.
__2024_01_24_h14m29s27__ER.jpg)
ل هه‌رێما كوردستانێ, ب رژێما حزبا به‌عس, سه‌دان زه‌ڤیێن مین رێژ هاتینه په‌یداكرن, تێدا رۆژانه مه‌ترسییا كوشتنا ده‌هان مروڤان هه‌یه, و پارێزگه‌ها دهۆكێ ژى, رێژا هه‌ره مه‌زن یا وان مینان ل هه‌مبێزا زه‌ڤیێن خۆ ڤه‌شارتییه,
دڤێ راپورتێ دا, مالپه‌رێ فه‌رمى یێ پارتى دیموكراتى كوردستان ئامارێن هویر یێن ساڵا 2023ێ یێن پاقژكرنا زه‌ڤیێن مین رێژ ل سنوورێ پارێزگه‌ها دهۆكێ دیاردكه‌ت:
ل دویف ئامارێن رێڤه‌به‌رییا گشتى یا كاروبارێن مینان ل پارێزگه‌ها دهۆكێ بۆ مالپه‌رى دیاركرین: ب تنێ دساڵا 2023ێ دا و هه‌ر ژ1ى هه‌یڤا 1 و هه‌تا 31ى هه‌یڤا 12, 6 سه‌د و 55 هزار و 591 مێترێن دوو جار یێن زه‌ڤیێن مین رێژ ل سنوورێ پارێزگه‌ها دهۆكێ هاتینه پاقژكرن, و ئه‌ڤ رێژه ل سه‌ر رووبه‌رێ 8 زه‌ڤییان هاتییه توماركرن, 4 ژوان زه‌ڤییان هاتینه پاقژكرن و بۆ خۆدانان هاتینه زڤراندن و 4 ژوان ژى زه‌ڤیێن شه‌رگه‌هانه, و دوان زه‌ڤییان دا, 274 مینێن دژه كه‌سى و 4 مینێن دژه تانكان, هه‌روه‌سا 2 هزار و 495 پارچه ته‌قه‌مه‌نى هاتینه ژناڤبرن.
__2024_01_24_h14m30s3__ER.jpg)
ل سنورێ پارێزگه‌ها دهۆكێ, و هه‌تا دویماهییا ساڵا 2023ێ, 778 زه‌ڤیێن مین رێژ هاتینه توماركرن, 368 زه‌ڤى ژوانا هاتینه پاقژكرن, و 410 زه‌ڤى ژوان ماینه, و رێژا هه‌ره مه‌زن یا مین و ته‌قه‌مه‌نییان ل سنوورێ پارێزگه‌ها دهۆكێ ل قه‌زا ئامێدیێ(57.2 كم باشور و رۆژهه‌ڵاتێ پارێزگه‌ها دهۆك) دهێته دیتن و هەتا نوکە ژی ئەو دەڤەر ب باشی نەهاتییە پاقژکرن، چونكه به‌رده‌وام ژلایێ چه‌كدارێن په‌كه‌كێ و فروكێن توركیاڤە دهێتە بوردومانکرن,
ل دویف دیاركرنا رێڤه‌به‌رییا گشتى یا كاروبارێن مینان, تیمێن مین لابه‌ریێ یێن دهۆكێ دئه‌ڤ ساڵه دا شیاینه رێژا هه‌ره مه‌زن یا رووبه‌رێ زه‌ڤیێن مین رێژ یێن هاتین پاقژكرن ل سه‌رانسه‌ر ده‌زگایێن كاروبارێن مینان ل سه‌ر ئاستێ هه‌رێما كوردستانێ توماربكه‌ت ب رێژا 46%.
ل سنوورێ پارێزگه‌ها دهۆكێ دگه‌ل ئیدارا سه‌ربه‌خۆ یا زاخۆ 6 تیم یێن راكرن و ته‌قاندنا مینان هه‌نه, 5 تیم ژوان یێن راكرنا مین و ته‌قه‌مه‌نیانه و 1 تیم ژى یا ته‌قاندنێ یه, و هه‌ر تیمه‌ك ژوان ژ8 مین لابه‌ر و 2 سه‌رپه‌رشت و 1 سه‌رووك تیم و 1 هاریكارێ نوژدارى دگه‌ل 2 شوفێران پێكدهێت, و ب گور گوتنا "رێگر بێدهى" رێڤه‌به‌رێ راگه‌هاندنا رێڤه‌به‌رییا گشتى یا كاروبارێن مینان, "ژبه‌ر قه‌یرانێن دارایی یێن ب سه‌ر هه‌رێما كوردستانێ ڤه ده‌ربازدبن, هه‌تا راده‌یه‌كێ تیمێن رێڤه‌به‌رییا مین و ته‌قه‌مه‌نییان دكێمن و ئاڵاڤێن هاتن و چوونێ و ترومبێل ژكاركه‌فتینه, لێ ب هاریكارییا پارێزگه‌ها دهۆكێ دگه‌ل رێكخراوه‌كا بیانى ئه‌م دشێین وه‌كو رێڤه‌به‌رى كارێ خۆ به‌رده‌وام ئه‌نجام بده‌ین".
__2024_01_24_h14m30s35__ER.jpg)
ژبۆ ڤه‌دیتنا زه‌ڤیێن مین رێژ 125 سه‌ره‌دان ژلایێ تێمێن رێڤه‌به‌ریێ ڤه بۆ جهان هاتینه كرن, و به‌رده‌وام هوشدارییا خه‌لكێ ب هه‌ماهه‌نگى دگه‌ل رێكخراوا sos و mag دهێته كرن, كو ئه‌و هوشیاربن ل ده‌مێ چوونا چیا و ئاقاران و نێزیك كه‌رستێن گومان لێكرى نه‌بن, و ئه‌گه‌ر هات و هه‌ر كه‌سه‌كێ كه‌رسته‌ك گومان لێكرى دیت په‌یوه‌ندیێ ب هێلا 182 یا بێ به‌رامبه‌ر بكه‌ت چونكه هه‌مى تیمێن مه به‌رده‌وام دئاماده‌باشیێ دانه ژبۆ سلامه‌تییا گیانێ خه‌لكێ.
و ژبۆ مه‌ره‌ما هوشیاركرنێ ل ساڵا 2023ێ ل سنوورێ پارێزگه‌ها دهۆكێ 442 سه‌ره‌دان بۆ جهێن جودا جودا هاتینه كرن و ژماه‌كا زور یا خول و سمیناران ژبۆ قوتابی و گه‌نجان و گروپێن چیاڤانى و گروپێن چاڤدێریا سلامه‌تیێ و بنگه‌هێن پولیسێن دارستانان و پولیسێن سنوران و رێڤه‌به‌ریێن حكومى و كومپانییان هاتینه پێشكێشكرن, هه‌روه‌سا 1 هزار و 23 كومبوون دگه‌ل وان هاتینه ئه‌نجامدان, تێدا چه‌ندین رێكارێن سلامه‌تیێ ب شێوازێن جودا جودا هاتینه دان.
دهه‌مان ده‌مدا ب درێژییا ساڵا 2023ێ, ل سنوورێ پارێزگه‌ها دهۆكێ 5 رویدانێن ته‌قینا مینان رویداینه تێدا 1 كه‌سى گیانێ خۆ ژده‌ست داییه و 5 كه‌س ژى برینداربووینه و هه‌ر 5 كه‌س ژى ژرەگەزێ نێربوون وخه‌لكێ سڤیل بوون.
ل دویف گوتنا رێڤه‌به‌رییا گشتى یا كاروبارێن مین و ته‌قه‌مه‌نییان, هه‌ر ده‌ما كار ل سه‌ر زه‌ڤییه‌كا مین رێژ ب دویماهیك دهێت, زه‌ڤییه‌كا دى ژبۆ پاقژكرنێ دهێته هه‌لبژارتن, ئه‌و ژى ل دویف هنده‌ك پیڤه‌ران بۆ نموونه (زه‌ڤى بۆ ده‌مه‌كێ دریژ هاتبیته چولكرن و بۆ مه‌ره‌مێن كشت و كالی و ته‌رش و ته‌والی نه‌هاتبیته بكار ئینان, هه‌روه‌سا ل دویف شاره‌زاییا خه‌لكێ گوندى دهێته هه‌لبژارتن كو ئه‌وان زانیاریێن پشت راستكرى هه‌نه ژبۆ هه‌بوونا مین و ته‌قه‌مه‌نییان، دیسان دبیت رویدان دوان زه‌ڤیان دا هاتبنه كرن).
__2024_01_24_h14m31s13__ER.jpg)
رێڤه‌به‌را رێڤه‌به‌ریا گشتى یا كاروبارێن مین و ته‌قه‌مه‌نیان ل پارێزگه‌ها دهۆكێ شیلان سامر ب رێكا راگه‌هاندنێ سوپاسییه‌كا تایبه‌ت ئاراسته‌ى رێڤه‌به‌رییا پارێزگه‌ها دهۆكێ و هه‌مى دام و ده‌زگه‌هێن په‌یوه‌ندیدار دكه‌ت یێن هاریكار دگه‌ل وان دا ژبۆ ئه‌نجامدانا كاروبارێن راكرن و ته‌قاندنا مین و ته‌قه‌مه‌نییان, و دووپات دكه‌ت كو ئه‌وان پلانه‌كا مه‌كوم یا دارێژتى ژبۆ ساڵا 2024ێ هه‌یه لێ دهه‌مان ده‌مدا كار و بارێن وان گرێدایی جێگیربوونا سه‌قای نه.
سه‌جا شێرزاد-دهۆك
