لە ئایندەیەکی نزیکدا قیستی پڕۆژەکانی وەبەرھێنان دەکرێتە دیناری عێراقی

گوتەبێژی دەستەی گشتی وەبەرھێنان ئاماژەی بۆ ئەوە کرد: سەرۆکی دەستە لەگەڵ وەبەرھێنەران گەیشتووەتە ڕێککەوتن بۆ ئەوەی قیستی پارەی پڕۆژەکانی وەبەرھێنان لە دۆلارەوە بکرێتە دیناری عێراقی و گوتیشی: لە ئایندەیەکی زۆر نزیکدا بڕیارەکە جێبەجێ دەکرێت.

بەرگەشت ئاکرەیی، گوتەبێژی دەستەی گشتی وەبەرھێنان بە ماڵپەڕی فەرمیی پارتی دیموکراتی کوردستانی ڕاگەیاند: سەرۆکی دەستە لەگەڵ وەبەرھێنەرانی کوردستان گەیشتووەتە ڕێککەوتن بۆ ئەوەی قیستی پڕۆژەکانی وەبەرھێنان لە دۆلارەوە بکرێتە دیناری عێراقی، بۆ ئەو بەمەستە بەرامبەر بە ١٠٠ دۆلاری ئەمریکی پارەیەکی دیاری کراوە و لە ئایندەیەکی زۆر نزیکدا بڕیارەکە ڕادەگەیەندرێت و ھاووڵاتییان دەتوانن بە پارە قیستی پڕۆژەکان بدەن.

گوتەبێژی دەستەی وەبەرھێنان دەڵێت: نرخێک دیار کراوە بۆ دۆلار نرخێکی زۆر گونجاوە لەبەرژەوەندی ھاووڵاتییانی ھەرێمی کوردستانە، چونکە سیاسەتی سەرۆکی حکوومەت و دەستەی وەبەرھێنانیش ئەوەیە ھەر بڕیارێک بدرێت لە بەرژەوەندی ھاووڵاتییاندا بێت، بەڵام بێگومان وەبەرھێنەرانیش چینێکی گرینگی ھەرێمن و نابێت زیان بەوانیش بگات.

بەرگەشت ئاکرەیی ئاماژەی بۆ ئەوە کرد: بەمەبەستی جێبەجێکردنی بڕیارەکە دەستە چاوەڕێی حکوومەتی فیدڕاڵە تا بزانین ئەوان کۆتا بڕیاریان لەبارەی دۆلارەوە چی دەبێت، دوای گەیشتنی بڕیاری بەغدا لە ھەرێمی کوردستان بڕیارەکە دەچێتە بواری جێبەجێکردن.

قائید میرۆ