ب تنێ ل 2023ێ, سه‌دان گه‌نجێن دهۆكێ ل كارگه‌هان بووینه كارمه‌ند
ساڵ بۆ ساڵێ و حكومه‌تا هه‌رێما كوردستانێ بزاڤا پێشڤه‌به‌رنا كه‌رتێ پێشه‌سازى دكه‌ت, بۆ هندێ مفا ژهێزا گه‌نجێن هه‌رێما كوردستانێ بهێته وه‌رگرتن, و بزاڤا ئابورى ب به‌رهه‌مئینان و هنارتنێ بۆ ژده‌رڤه‌ى وه‌ڵاتى زێدده‌ببیت.
ئێكه‌م پێنگاڤا پێشڤه‌برنا كه‌رتێ پیشه‌سازى ڤه‌كرنا كارگه‌هانه, و مالپه‌رێ فه‌رمى یێ پارتى دیموكراتى كوردستان دڤێ راپورتێ دا ئامارێن كارگه‌هان ل پارێزگه‌ها دهۆكێ و گرنگییا هه‌بوونا وان دده‌ته دیاركرن.
ل دویف وان ئامارێن رێڤه‌به‌رییا وه‌به‌رهێنانێ ل پارێزگه‌ها دهۆكێ تایبه‌ت بۆ مالپه‌رێ فه‌رمى یێ پارتى دیموكراتى كوردستان دیاركرین: هه‌ر ژ1ى هه‌یڤا 1 ساڵا 2007ێ و هه‌تا 31ى هه‌یڤا 12 ساڵا 2023ێ, ل پارێزگه‌ها دهۆكێ دگه‌ل ئیدارا سه‌ربه‌خۆ یا زاخۆ 71 كارگه‌هان موله‌تا وه‌به‌رهێنانێ ژرێڤه‌به‌رییا وه‌به‌رهێنانێ و حكومه‌تا هه‌رێما كوردستانێ ل دویف یاسا وه‌به‌رهێنانێ یا ژماره 4 یا ساڵا 2006ێ وه‌رگرتینه.
ل ده‌مه‌كێ ئه‌و 71 موله‌تێن كارگه‌هان ژبۆ چوار جوره كارگه‌هان دهێنه دان, ئه‌وژى كارگه‌هێن پیشه‌سازى, كارگه‌هێن پیشه‌سازى خوراكى و كارگه‌هێن پیشه‌سازى چاندن و كارگه‌هێن پیشه‌سازى بازرگانى, و ژوان 71 موله‌تان ژى, 29 موله‌تێن كارگه‌هان ب تنێ ل ساڵا 2023ێ هاتینه دان.
هه‌ڤال سه‌دیق, رێڤه‌به‌رێ وه‌به‌رهێنانێ ل پارێزگه‌ها دهۆكێ: "هه‌بوونا كارگه‌هان ل پارێزگه‌ها دهۆكێ گرنگییه‌كا مه‌زن هه‌یه, تایبه‌ت ژبۆ په‌یداكرنا ده‌لیڤێن كارى بۆ گه‌نج و هێزێن باژێرى, و ژلایه‌كێ دى ژى ڤه‌كرنا كارگه‌هان دێ رێكێ ژبۆ ب كارئینانا به‌رهه‌مێن ناڤخوى تایبه‌ت یێ جوتیاران ڤه‌كه‌ت و دێ بیته ده‌لیڤه‌ك مه‌زن بۆ جوتیارێن مه ژبه‌رهه‌مێن خۆ بێ هیڤى نه‌بن, بۆ نموونه كارگه‌ها دروستكرنا هه‌ڤیرێ ته‌ماتێ دێ ژلایه‌كێ ژماره‌كا باش یا گه‌نجان لێ كار كه‌ت و ژلایه‌كێ دى ژى, دێ ته‌ماتا ناڤخوى یا جوتیاران هێته بكار ئینان ب ڤى ره‌نگێ پارێ حكومه‌تێ بۆ به‌رهه‌مێ ژده‌رڤه ناچیت و به‌رهه‌مێ ناڤخوى ژى ب زه‌عێ ناچیت و ژماركا دى ژى یا گه‌نجان دێ ل وان ئه‌ردێن چاندنێ ب كاركه‌ڤن ژبۆ به‌رهه‌مئینانا ته‌ماتێ.
دیسان ڤه‌كرنا كارگه‌هان دبیته ئه‌گه‌رێ كێم هاورده كرنا به‌رهه‌مێن ده‌رڤه یێن بیانى و ئه‌ڤه پێنگاڤه‌ك گرنگه ژبۆ پاراستنا ئاسایشا خوراكى كو ب زانین به‌رهه‌مێن ب كاردئینین ژچ كه‌رسته و چه‌وا هاتینه دروستكرن".
كابینا 9ێ یا حكومه‌تا هه‌رێما كوردستانێ بریار دایه ل هه‌مى پارێزگه‌هێن هه‌رێما كوردستانێ و ل سه‌ر ئاستێ هه‌مى پرۆژه‌یان, نابیت رێژا كارمه‌ندێن ناڤخوى (خه‌لكێ ده‌ڤه‌رێ) ژ75% كێمتربیت, و ئه‌ڤ بریاره 100% دبه‌رژه‌وه‌ندیا گه‌نجێن كوردستانێ دایه, تایبه‌ت كو به‌رییا چند رۆژان د.عه‌لى ته‌ته‌ر پارێزگارێ پارێزگه‌ها دهۆكێ ئه‌و چه‌نده دووپات كر كو ل گه‌له‌ك پرۆژه‌یێن پارێزگه‌ها دهۆكێ رێژا كارمه‌ندێن ناڤخوى گه‌له‌ك پتره ژرێژا ده‌ستنیشانكرى به‌لكو ل هنده‌ك پرۆژه‌یان ژى رێژا كارمه‌ندێن ناڤخوى گه‌هشتییه 100%.
هه‌ڤال سه‌دیق دووپات دكه‌ت كو كابینا نه‌هێ یا حكومه‌تا هه‌رێما كوردستانێ هه‌مى ئاسان كارى كرینه ب رێیا ده‌رخستنا هنده‌ك رێنمایان و نه‌هێلانا هنده‌كێن دى, ئه‌و ژى ژبۆ باشتر برێڤه‌برنا كاروباران و نه‌هێلانا گرێ و روتینان, و ئه‌ڤ ئاسانكارییه ده‌رگه‌هه‌كه ژبۆ هه‌رێما كوردستانێ و پارێزگه‌ها دهۆكێ ل ساڵێن بهێت دا بگه‌هین وێ قوناغێ, به‌رهه‌مێ مه ژپێدڤیاتییامه پتربیت و ل وى ده‌مى نه ب تنێ به‌رهه‌مێ خوراكى به‌لكو گه‌له‌ك جورێن دى یێن به‌رهه‌مان ب هنێرین ژده‌رڤه‌ى كوردستانێ.
ڤه‌كرنا كارگه‌هان دسیسته‌مێ حكومه‌تا هه‌رێما كوردستانێ دا ب دوو رێكان دهێته كرن, یا ئێكێ ب رێیا وه‌رگرتنا موله‌تێ ژرێڤه‌به‌رییا وه‌به‌رهێنانێ, و یا دویێ ب رێیا رێڤه‌به‌رییا گه‌شه‌پێدانا پیشه‌سازى,
و مالپه‌رێ فه‌رمى یێ پارتى دیموكراتى كوردستان ئامارێن جودا یێن رێڤه‌به‌رییا گه‌شه‌پێدانا پیشه‌سازى دده‌ته دیاركرن:
هه‌ر ل ساڵا 1997ێ و هه‌تا 31ى هه‌یڤا 12 ساڵا 2023ێ ل پارێزگه‌ها دهۆكێ دگه‌ل ئیدارا سه‌ربه‌خۆ یا زاخۆ ژمارا كارگه‌هان گه‌هشتییه 431 كارگه‌هان, و ب تنێ دساڵا 2023ێ دا 14 كارگه‌ه ب رێیا رێڤه‌به‌رییا گه‌شه‌پێدانا پیشه‌سازى هاتینه ڤه‌كرن و دوان 14 كارگه‌هان دا 376 كارمه‌ند هاتینه دانان.
ل هه‌رێما كوردستانێ و پارێزگه‌ها دهۆكێ هه‌ر زێده‌گاڤییه‌ك ژلایێ كارگه‌هان دكارى دا بهێته كرن دێ ل دویف یاسا ژماره 20 یا ساڵا 1998ێ هێنه سزادان لێ به‌رى جێبه‌جێكرنا سزایێ ب هه‌یڤه‌كێ, رێڤه‌به‌رییا كارگه‌ها پیشیلكار دهێته ئاگه‌هداركرن.
سه‌جا شێرزاد-دهۆك
