دساڵا بوری دا 243 سەرپێچکارێن دارستانان ل دهۆکێ هاتینە گرتن
بەر داکەفتنا پلەیێن گەرمێ و سەقایێ هەرێما کوردستانێ یێ سار ل وەرزێ زڤستانێ، مەترسییا سەرپێچیێن دار برینێ زێدە دبیت، و لەورا هێزا پاراستنا ژینگەهێ بەردەوام ب چاڵاکیێن جوراجور رادبیت ژبۆ وێ چەندێ، ژلایەکێ سنورەک ژبۆ دیاردا داربرینێ بهێتە دانان وژلایەکێ دی ژی خەلکێ بەردەوام ل سەر مەترسییا دار برینێ پێ بگەهینن،
ل دویف وان ئامارێن هێزا پاراستنا ژینگەهێ ل پارێزگەها دهۆکێ بۆ مالپەرێ فەرمی یێ پارتی دیموکراتی کوردستان دیارکرین، ب تنێ دساڵا 2023ێ دا و هەر ژ1ی هەیڤا 1 و هەتا 31ی هەیڤا 12، ل پارێزگەها دهۆکێ 550 جاران ڤه‌دیتنا وان جهێن دار لێ دهێنه کە‌زاختن هاتییە کرن، و 54 خالێن پشکنینێ یێن گەروک (مه‌فره‌زه) ژبۆ جهێن گومان لێ هه‌ى کو دێ سه‌رپێچاكار هه‌بن هاتینە دانان، و دوان ڤەدیتن و خالان دا 243 سه‌رپێچكارێن جوراوجور هاتینە گرتن 33 سەرپێچکار ژوان داربر بوون و 29 نێچیرڤان بوون و 181 ژی ماسى گر بوون، و ژلایێ 209 سەرپێچکاران ژوان سوزنامه هاتینه ئیمزاكرن بۆ هندێ وێ سەرپێچیێ دوبارە نەکەن.
ل پارێزگەها دهۆکێ ژمارەکا باش یا ژینگەه دوستان هەیە وپارێزگارێ دهۆکێ د.عەلی تەتەر بەردەوام دلێدوان وگوتنێن خۆدا دووپاتێ ل سەر گرنگییا ژینگەه پارێزیێ دکەت، ژبەر وێ چەندێ ژی هێزا پاراستنا ژینگەهێ 47 رێزلێئینانێن فەرمی ژبۆ كه‌سانێن ژینگه‌ه پارێز و پێشمه‌رگه و ئه‌فسه‌رێن چاڵاك د ساڵا 2023ێ دا پێشکێشکرییە،
ل دویف وان ئامارێن رێڤەبەرێ رێڤەبەرییا دارستان و پاوان ل پارێزگەها دهۆکێ بۆ مالپەرێ فەرمی یێ پارتی دیموکراتی کوردستان دیارکرین، ل سنوورێ پارێزگەها دهۆکێ 1 ملیون و 700 دونەمێن ئەردی یێن دارستانان هەنە، و بەرییا نێزیک دوو هەیڤان ژی مەزنترین هەوەیا کەسکرنێ ل پارێزگەها دهۆکێ ژبۆ 100 دونەمێن ئەردی هاتە ئەنجامدان کو تێدا دێ ١٥ هزار دار هێنە چاندن، وئەڤ چەندە ژی ل دویف گوتنا موحەمەد تاهر بریفکانی شارەزایێ ژینگەهێ کو تایبەت بۆ مالپەرێ فەرمی یێ پارتی دیموکراتی کوردستان دیارکری: “ل سەنتەرێ پارێزگەها دهۆکێ رێژا کەسکاتیێ ب ئامارێن هویر و دووپاتکری نینن لێ ئەگەر ئەو ١٠٠ دونەم هاتنە چاندن لەوانەیە رێژا کەسکاتیێ ل دهۆکێ بگەهیتە ١٣٪”.
ژبۆ پێگەهاندنا خەلکێ هێزا پاراستنا ژینگەهی دساڵا 2023ێ دا 155 سمینار بۆ سازیێن په‌روه‌ردێ و ناڤه‌ندێن خواندنێ هه‌ر ژقوناغێن باغچه و سه‌ره‌تایی تا زانكویان، دگەل 9 په‌نه‌لێن زانستى ب هه‌ڤكارى دگه‌ل رێڤه‌به‌رییا دارستان و پاوانان و ڤه‌كولیتیا ته‌كنیكى یا دهۆك پێشکێشکرینە، وتێدا پێگەهاندنا خەلکێ و قوتابی وبەژداران ب شێوەیەک گشتی ل سەر گرنگییا دار چاندن ورێژا کەسکاتیێ و مەترسییا ژناڤبرنا داران و ئەردێن کەسک کرییە.
دیاسا ژمارە 10 یا دارستانێن هەرێما کوردستانێ یا ساڵا 2010ێ، ژمارەک سزایان بەرامبەر وان کەسێن سەرپێچکار هەمبەر دارستانان دیاردکەت، و ژوان سزایێن دیار، کو هەر کەسەک ب بڕینا دارێن دارستانەکێ راببیت تایبەت وان دار و بارێن دەگمەن یان ژیێ وان درێژ، یان سوتنا وان یان ژی گهورینا شێواز و رێکخستنا وان، ل دویف یاسایێ دهێتە زیندانکرن بۆ نە کێمتر ژ٦ هەیڤان هەر وەسا دانا نە کێمتر ژ٥ ملیون دینارێن عیراقی وەک سزا بەرامبەر سەرپێچییا خۆ.
سەجا شێرزاد-دهۆک
