ل سنوورێ پارێزگەها دهۆکێ ل 2023ێ دا 989 پرۆژە هاتینە جێبەجێکرن
ب پشتەڤانییا کابینەیا نەهێ یا حکومەتا هەرێما کورستانێ ب تنێ دماوێ ساڵا 2023ێ دا 989 پرۆژەیێن خزمەتگوزاری ل سەرانسەر پارێزگەها دهۆکی هاتینە بجه ئینان.
و دچافپێکەفتنەک تایبەت دا دگەل مللەت عسمەت، بەرپرسێ راگەهاندنا رێڤەبەرییا گشتی یا پارێزگەها دهۆک، ئامارێن هەمی پرۆژەیێن ساڵا 2023ێ هەر ژ1ی هەیڤا 1 و هەتا 31ی هەیڤا 12 بۆ مالپەرێ فەرمی یێ پارتی دیموکراتی کوردستان دیاركرن،
و ژئامارێن ساڵا بوری (ساڵا 2023ێ)، دیاردبیت کو ل سەرانسەر پارێزگەها دهۆکێ ل هەمی قەزا وناحی وگوندان،
ل سەر ئاستێ کەرتێ رێك و پران 485 پرۆژه هاتینە ئەنجامدان.
ل سەر ئاستێ كه‌رتێ كاره‌بێ 183 پرۆژە هاتینە ئەنجامدان.
ل سەر ئاستێ کەرتێ ئاڤێ 132 پرۆژه هاتینە ئەنجامدان.
ل سەر ئاستێ کەرتێ ته‌ندروستى 38 پرۆژه هاتینە ئەنجامدان.
ل سەر ئاستێ کەرتێ په‌روه‌ردێ 58 پرۆژە هاتینە ئەنجامدان.
ل سەر ئاستێ کەرتێ چاندنێ و پرۆژێن كشت و كالى 28 پرۆژه هاتینە ئەنجامدان.
ل سەر ئاستێ کەرتێ وه‌به‌رهێنانێ 65 پرۆژه هاتینە ئەنجامدان.
ئەڤرۆ رێکەفتی 2ی کانوونا دووێ یا ساڵا 2024ێ کۆنگرەیەکێ رۆژنامەڤانی ژلایێ “د.عەلی تەتەر” پارێزگارێ پارێزگەها دهۆک هاتە دانان تێدا ب درێژی باس ل کار و پرۆژەیێن حکومەتا هەرێما کوردستانێ کر یێن ل پارێزگەها دهۆکێ دساڵا بوری دا هاتینە ئەنجامدان، هەروەسا تێدا سوپاسییەک تایبەت ئاراستەی هەمی هێزێن ئێمناهی ژبۆ پاراستنا ئاسایشا هه‌رێما كوردستانێ و پارێزگەها دهۆکێ کر ب تایبەتی ل رۆژانێن گێرانا ئاهەنگێن سەرێ ساڵێ.
سەبارەت ب پرۆژەیان ژی گوت “دپلانێن دانانا پرۆژەیان دا کابینەیا نەهێ یا حکومەتا هەرێما کوردستانێ دادپه‌روه‌رانە کار ددابەشکرنا ژمارەیا پرۆژەیان دکەت ل دویف داخوازییا هەر دەڤەرەکێ ب شێوازەکێ گرنگی ب هەمی دەڤەر وجهێن چیایی و سنوری و دویر ژسەنتەرێ پارێزگەهی بهێتە کرن، بۆ هندێ هەمی خەلکێ دهۆکێ ب یەکسانی مفایی ژخزمەتگوزارییان ببینن”
چ پێ نەڤێت ب جه ئینانا ئەڤێ ژمارەیا پرۆژەیان ل سەر ئاستێ پارێزگەها دهۆکێ بوویە ئەگەرێ پەیداکرنا سەدان دەلیڤێن کاری بۆ گەنجان و خۆشبەختانە، ل سه‌ر بریارا مه‌سرور بارزانى سەروکێ حکومەتا هەرێما کوردستانێ ل هەمی پرۆژەیێن خزمەتگوزاری یێن هەرێما کوردستانێ دڤێت رێژا كارمه‌ندێن ناڤخوى دهەر پرۆژەیەکێ دا ژ75% کێمتر نەبیت، وپارێزگارێ دهۆکێ ژلایێ خۆڤە دووپات کر کو دپترییا پرۆژەیێن پارێزگەها دهۆکێ دا رێژا کارمەندێن ناڤخوی پترە ژرێژا دەستیشانکری و دگەلەک پرۆژەیان دا ژی رێژە گەهشتییە 100%.
چ پێ نەڤێت دەهان پرۆژەیێن دەسپێکری یێن ساڵا 2023ێ دئەڤ ساڵە دا دێ هێنە ب دویماهیک ئینان، و ب گور گوتنا د.عەلی ئەو پرۆژێن ب دویماهیک نەهاتی دێ ل چه‌ند هه‌یڤێن ده‌سپێكى یێن ساڵێ هێنه جێبه‌جێكرن و ب دویماهیک ئینان، و دگەل دا دێ دەست ب دەهان پرۆژەیێن دی یێن خزمەت گوزاری هێتە کرن، و بریارە دساڵا نوی دا گرنگى ب کەرتێن وه‌رزش و هونه‌ر و ره‌وشه‌نبیرى و كولتورى دیسان هەردوو کەرتێن كشت و كالى و گه‌شتیارى بهێتە کرن.
هەر وەسا ئاماژە ب وێ چەندێ هاتە کرن کو كار ل سه‌ر پرۆژێ فروكخانا پارێزگەها دهۆک به‌رده‌وامه، و دئەڤ ساڵە دا کار دێ ل سەر پرۆژەیێن:
ده‌وروبه‌رێن سه‌دا دهۆك.
ئاریشێن ئاڤێ و سکرێ دهۆک و موسل.
کەرتێ گەشتیاری ل ده‌ڤه‌رێن ئامێدى و ده‌وروبه‌ران.
پرۆژێ باشترکرنا كارەبا گشتی.
سەجا شێرزاد-دهۆک
