زیبا تەھا: ھەیکەلی یەکێتی ئافرەتانی کوردستان دەگۆڕدرێت

سکرتێری یەکێتی ئافرەتانی کوردستان ئاماژەی بۆ ئەوە کرد، بەپێی بڕیاری کۆنگرە ھەیکەلی یەکێتی ئافرەتانی کوردستان بەتەواوەتی گۆڕانکاری بەسەردادێت، دەشڵێ: ئۆرگانەکانی ئافرەتان ڕاستەوخۆ سەر بە مەکتەبی سکرتاریەت دەبن.

زیبا تەھا، سکرتێری نوێی یەکێتی ئافرەتانی کوردستان بە ماڵپەڕی فەرمیی پارتی دیموکراتی کوردستانی ڕاگەیاند: ئێمە وەک ستافی نوێی سکرتایەتی یەکێتی ئافرەتانی کوردستان بە پلان و نەخشەڕێگای نوێ دەست بە خزمەت دەکەینەوە، بەشێوەیەکی سەردەمیانە و بەپێی خواستی ئافرەتانی کوردستان کار دەکەین، لەگەڵ لایەنی پەیوەندیدار و حکوومەت ھەوڵدەدەین ئەو یاسایانەی پەیوەستن بە ئافرەتان ھەموار بکرێنەوە و ئەوانەیشی پێویستن یاسای نوێی بۆ دەربکرێت.

سکرتێری یەکێتی ئافرەتانی کوردستان گوتیشی: یەکێتی ئافرەتانی کوردستان لەسەر ئەو بنەمایەی یەکێتیەکە لەسەری دامەزراوە بەردەوام دەبێت، بەتایبەتی ئێمە بەگژ ھەموو ئەو داب و نەریتانەدا دەچینەوە لەگەڵ مافی مرۆڤ و مافی ئافرەت ناگونجێن، لەسەر بنەما دیموکراسییەکان بەردەوام دەبین و پرسی نیشتمانی لە ئەولەویەتی کارەکانی ئێمە دەبێت.

زیبا تەھا ئاماژەی بۆ ئەوە کرد: پەیڕەوی ناوخۆی یەکێتی ئافرەتانی کوردستان لە کۆنگرە گۆڕانکاری بەسەردا ھاتووە و دوای دەستبەکاربوونمان گۆڕانکاری گەورە دەکەین لە ڕێکخراوەکەمان، بەتایبەتی بەپێی پەیڕەوی نوێ سکرتاریەت ڕاستەوخۆ پەیوەندی لەگەڵ ناوەندی چالاکی ئافرەتان دەبێت، ئورگانەکانی یەکێتی ئافرەتانی کوردستان ڕاستەوخۆ پەیوەندییان بە سکرتاریەتەوە دەبێت.

قائید میرۆ