نەوزاد ھادی: لیستی پارتی لە نەینەوا ھەر بە لیستی یەکەم دەمێنێتەوە

ئێوارەی ئەمڕۆ لە شارۆچکەی سێمێلی پارێزگای دھۆک کەرنەڤاڵی جەماوەری شنگال بۆ پشتیوانی لە لیستی ١٩٧ی پارتی بەڕێوەچوو تێیدا بەرپرسی مەکتەبی ڕێکخستنی نەینەوای پارتیش گوتی: لیستی پارتی لە نەینەوا ھەر بە لیستی یەکەم دەمێنێتەوە و خەڵکی شنگالیش وەفاداربوونە بۆ رێبازی بارزانی.

نەوزاد ھادی، بەرپرسی مەکتەبی رێکخستنی نەینەوای پارتی بە ماڵپەڕی فەرمیی پارتی دیموکراتی کوردستانی ڕاگەیاند: سوپاسی دڵسۆزی خەڵکی شنگال دەکەین بەرامبەر بە پارتی و ڕێبازی پیرۆزی بارزانی، خەڵکی شنگال بەھۆی کارەساتەکانی بەسەریان ھاتووە زەحمەتی زۆریان کێشاوە لە ئاوارەیی و دەربەدەری، ھەرچەندە ژیانی نێو کەمپەکان ئاسان نییە، بەڵام ھاووڵاتییانی شنگال وەفاداربوون و ئامادەنەبوون بگەڕێنەوە، شنگال ھەر بە دڵسۆزی دەمێنێتەوە بۆ ڕێبازی بارزانی.

بەرپرسەکەی پارتی گوتیشی:  لیستی ئێمە لیستی سەرۆک بارزانییە بۆ خزمەتکردنی شنگال و ھەموو ناوچەکانی دیکە، لیستی ١٩٧ی پارتی لیستی یەکەمە لەسەر ئاستی نەینەوا، چونکە لیستی پارتی و سەرۆک بارزانییە، لیستی پارتی بۆ جێبەجێکردنی فەرمانەکانی سەرۆک بارزانییە لەوانەش گەڕانەوەی خەڵکی شنگال.

ھادی ئاماژەی بۆ ئەوە کرد:  سەقامگیری و ئاوەدانی شنگال و شنگالییەکان لە لیستی پارتی دیموکراتی کوردستانەوە سەرچاوە دەگرێت، لیستی ١٩٧ی پارتی ھەر بە لیستی بەھێزی نەینەوا دەمێنێتەوە بۆ خزمەتکردنی خەڵکی نەینەوا و کاندیدانی پارتیش ھەموویان کەسانی لێھاتوون بۆ خزمەتکردنی ھاووڵاتییان.

قائید میرۆ