34 وه‌ڵاتێن بیانى پشكدارى فلمه‌ڤیسته‌ڤاڵا دهۆك یا نیڤده‌وله‌تى بووینه
ئه‌گه‌ر "زمان نه هێته ئازاد كرن گه‌ل ناهێنه ئازاد كرن" و ژبه‌ر ڤێ چه‌ندێ, ل ژێر مژارا "زمانێ دایك" فلمه ڤیسته‌ڤالا دهۆك یا نیڤده‌وله‌تى دئه‌ڤ ساڵه دا فوكسا خۆ یا سه‌ره‌كى دبابه‌تێن فلمان دا كرییه زمان و خواستییه هه‌ر فلمه‌ك ب زمانێ ره‌سه‌نى وێ ده‌ڤه‌را فلم لێ هاتى دروستكرن بهێته پێشكێشكرن.
ده‌هه‌مین ساڵه فلمه ڤیسته‌ڤاڵا دهۆك گه‌شا خۆ دكه‌ت و ساڵ بۆ ساڵێ هه‌ول دهێته دان ئاستێ فلمان ژساڵا پێشتر باشتر بیت و حه‌سه‌ن فه‌تاح رێكخه‌رێ راگه‌هاندنا فلمه ڤیسته‌ڤاڵا دهۆك یا نیڤده‌وله‌تى و په‌یڤدارێ رێڤه‌به‌رییا ره‌وشه‌نبیرى و هونه‌رى یا دهۆك, تایبه‌ت بۆ مالپه‌رێ فه‌رمى یێ پارتى دیموكراتى كوردستان سه‌باره‌ت ب ڤیسته‌ڤاڵێ دبێژیت:
"فلمه ڤیسته‌ڤالا دهۆك یا نیڤده‌وله‌تى پێنگاڤه‌كا مه‌زن یا شارستانیه‌تێ یه تێدا ره‌سه‌ناتیا كولتور و زمان و دیروكا خۆ دیاردكه‌ین, تایبه‌ت كو مژارا ئه‌ڤ ساڵه یا ڤیسته‌ڤاڵێ زمانێ دایكێ یه, كو هه‌ر ملله‌ته‌ك ب ئازادانه ده‌ربرینێ ب زمانێ خۆ یێ ره‌سه‌ن بكه‌ت و ئه‌م ب ڤێ رێیێ بزاڤێ دكه‌ین سینه‌مامه بۆ ژیانێ و هه‌مى جڤاكان بیت و ببیته كولتور."
فلمه ڤیسته‌ڤال ل 9ى ڤێ مه‌هێ ده‌سپێكرییه و بۆ 8 رۆژان دێ به‌رده‌وام بیت, كو ل رۆژا ئێكێ یا ڤیسته‌ڤاڵێ رێوه‌رسمێن پروتوكولینه, هونه‌رمه‌ند و سینه‌ماكار و ئه‌كته‌ر و ده‌رهێنه‌ر و مێهڤانێن پشكدار ل سه‌ر فه‌رشێ سور ده‌ربازبوون و پاشان په‌یڤێن ب خیرهاتنێ هاتنه پێشكێشكرن, و فلمێ (opening-ئوپنینگێ) ئێكه‌م فلمێ ڤه‌كرنا ڤیسته‌ڤاڵێ فلمێ (به‌غداد مێسى)بوو, ژده‌رهێنه‌رییا ده‌رهێنه‌رێ كورد سه‌هیم عومه‌ر خه‌لیفه بوو, و وه‌ك رێزگرتن بۆ وێ كاره‌ساتا ل ئیدارا سه‌ربه‌خۆ یا سوران رویدای و گیانێ قورانییان و ماڵباتێن وان, هه‌مى برگه‌یێن گرێداى ستران و موزیكێ هاتنه راگرتن.
لێ ل رۆژا دویێ.. ئه‌ڤرۆ به‌رنامێ پوخت یێ ڤیسته‌ڤاڵێ هاتییه بجه ئینان, كو تێدا دێ 18 فلم هێنه نیشاندان و ل ده‌سپێكێ په‌نه‌له‌ك ل دور بابه‌تێ زمان و سینه‌ما ژلایێ چوار په‌نه‌لیستان ژده‌ڤه‌رێن جودا هاتییه پێشكێشكرن و ب گور گوتنا حه‌سه‌ن فه‌تاحى "په‌نه‌له‌كێ گه‌رم و گور بوو, چونكه هه‌ردووك خزمه‌تا ئێك دكه‌ن, زمان ب سینه‌مایێ ره‌سه‌ن و پاراستى دمینیت و سینه‌ما ژى ب زمانى جهێ خۆ دكه‌ت و گه‌شێ دكه‌ت, و چ پێ نه‌ڤێت ئه‌ڤ جوره په‌نه‌له هه‌ره گرنگن بۆ هندێ ل ڤیسته‌ڤاڵێن بهێن مفا ژێ بهێته وه‌رگرتن"
دئه‌ڤ ساڵه دا 116 فلم ژبۆ ڤیسته‌ڤاڵێ هاتینه دروستكرن, 50 ژوان فلمان كوردى نه و 66 فلم ژى بیانى نه, و ژوان فلمان ژى 57 فلم ژبۆ هه‌ڤركییا برنا خه‌لاتان دێ هێنه هه‌لبژارتن, و یا دیاره كو فلمه ڤیسته‌ڤالا دهۆك سنورێ ده‌ڤه‌راتیێ تێپه‌راندییه و ل سه‌ر ئاستێ نیڤده‌وله‌تى كار دكه‌ت, چونكه پشكدارێن فلمان ژهه‌ر چوار پارچێن كوردستانێ نه و ژ34 وه‌لاتێن بیانى نه, و فلمێن ڤیسته‌ڤاڵێ ژى دێ ب 16 زمانان هێنه نیشاندان.
جوداهییا ئه‌ڤ ساڵه یا ڤیسته‌ڤاڵێ ئه‌وه كو فلمێن ڤیسته‌ڤاڵێ دێ ل 4 جهێن ده‌ستنیشانكرى هێنه نیشاندان, ئه‌و ژى جهێ سه‌ره‌كى یێ فلمه‌ڤیسته‌ڤالێ یه (هولا كونفرانسان) دیسان هولێن (سینه‌ما ماكس) ل دهۆك مۆڵ, و (چاكسازییا زركا) و (ناڤه‌ندا قۆتابیان), و ئه‌ڤه ژبۆ وێ چه‌ندى یه, كو گرتییان ژى مافێ ژیانێ و هه‌لبژارتنێن خۆ هه‌نه و بێ به‌هر نه‌بن ژبه‌رده‌وامبوونا ژیانا خۆ, و حه‌سه‌ن فه‌تاحى دووپات كر كو ئه‌و فلمێن بۆ قۆتابیان و گرتییان و زارووكان هاتینه هه‌لبژارتن فلمێن ژێگرتى نه ل دویف ته‌مه‌ن و ره‌وشا بینه‌ران تایبه‌ت كو ناڤه‌رووكێن ڤان فلمان گه‌له‌ك وانه‌یێن ژیانێ تێدا هه‌نه.
سه‌جا شێرزاد-دهۆك
