ژبۆ هه‌لبژارتنێن جڤاتێن پارێزگه‌هێن عیراقێ روینشتنه‌ك ژلایێ ئوفیسا دهۆك یا هه‌لبژارتنان دگه‌ل رێڤه‌به‌رێن كه‌مپێن ئاواره‌یان ل پارێزگه‌ها دهۆكێ هاته ئه‌نجامدان
16ى ڤێ مه‌هێ ئاوارێن شنگال دێ چنه سه‌ر سندوقێن ده‌نگدانێ
وه‌ك به‌رهه‌ڤى ژبۆ هه‌لبژارتنێن جڤاتێن پارێزگه‌هێن عیراقێ و ب هه‌ماهه‌نگى دگه‌ل رێڤه‌به‌رییا كوچ و كوچبه‌ران یا پارێزگه‌ها دهۆكێ و ده‌زگه‌هێ خێرخوازى یێ بارزانى, ئه‌ڤرۆ روینشتنه‌ك ژلایێ ئوفیسا دهۆك یا هه‌لبژارتنان دگه‌ل رێڤه‌به‌رێن كه‌مپێن ئاواره‌یان ل پارێزگه‌ها دهۆكێ هاته ئه‌نجامدان, تێدا دویماهى پێشهات و رێنما ل دور بابه‌تێن دابه‌شكرنا كارتا ده‌نگدانێ و پێرابونێن ده‌نگدانێ و هه‌وا هه‌لبژارتنان و چه‌وانیا ده‌نگدانێ بۆ هه‌لبژارتنێن جڤاتێن پارێزگه‌هێن عیراقێ بۆ ساڵا 2023ێ گه‌نگه‌شه هاته كرن.
ژبۆ ڤان هه‌لبژارتنان ل پارێزگه‌ها دهۆكێ 23 بنگه‌هێن ده‌نگدانێ كو 96 ویستگه‌هان بخۆڤه دگرن, ژبۆ ئاواره‌یێن دناڤ كه‌مپ و ژده‌رڤه‌ى كه‌مپان هاتینه دانان, ل ده‌مه‌كێ كو دهه‌مان رۆژدا ده‌نگدانا هێزێن ناڤخۆ ژى یێن سه‌ر ب حكومه‌تا عیراقێ ڤه دێ هێنه كرن و ژبۆ وان هێزان ژى 11 بنگه‌هێن ده‌نگدانێ كو 35 ویستگه‌هان بخۆڤه دگرن هاتینه دروستكرن.
هه‌لبژارتنێن جڤاتێن پارێزگه‌هێن عیراقێ دێ ل 16ى ڤێ هه‌یڤێ هێنه ئه‌نجامدان تێدا دێ پتر ژ39 هزار ده‌نگده‌ر ژئاواره‌یێن ناڤ كه‌مپ و ژده‌رڤه‌ى كه‌مپان, هه‌روه‌سا پتر ژ14 هزار ده‌نگده‌ر ژهێزێن له‌شكه‌رى یێن سه‌ر ب وه‌زاره‌تا ناڤخۆ یا عیراقێ به‌ژدارى پرۆسێ بن.
كومسیونا هه‌لبژارتنان ئوفیسا دهۆك دیاركر كو گه‌له‌ك ژرێكخراوان په‌یوه‌ندى ب ئوفیسێ كرینه تایبه‌ت ژبۆ چاڤدێرییا پروسێسا هه‌لبژارتنان و دووپات كر كو هه‌مى ئه‌و رێكخراوێن ناڤخوى و بیانى دێ ماف هه‌بن به‌ژداریێ بكه‌ن دگه‌ل ده‌زگه‌هێن راگه‌هاندنێ و قه‌وارێن سیاسى.
دئه‌ڤ ساڵه دا (2023)ێ 9 ساڵ سه‌ر ب كاره‌ساتا شنگال ڤه ده‌ربازبوون, تێدا 5 سه‌رووك وه‌زیر دگه‌ل 150 وه‌زیر هاتینه سه‌ر حوكمێ عیراقێ, لێ هه‌تا نوكه ژى نه شیاینه ئاریشه‌یا شنگال و ئاواره‌یان چاره‌سه‌ر بكه‌ن.
ئه‌ڤرۆ مه‌حما خه‌لیل په‌رله‌مانتارێ عیراقێ دپرێس كونفرانسه‌كێ دا بۆ راگه‌هاندنێ دیاركر كو وه‌زاره‌تا كوچ و كوچبه‌ران ل عیراقێ لاوازه وب جوداهى كارێ خۆ ئه‌نجام دده‌ت و خو ل ئاوه‌ره‌یێن شنگالێ ل هه‌رێما كوردستانێ ناكه‌نه خودان و تایبه‌ت ب هاتنا وه‌زێن زڤستانێ چ هاركارییان دژى سه‌رمایێ ژبۆ كه‌مپان دابین ناكه‌ن نه ژسوته‌مه‌نى و نه چادر و گه‌له‌ك ژپێدڤیێن دى, هه‌روه‌سا رێككه‌فتنا شنگال ژى جێبه‌جێ نه بوویه,
دیسان گوت: "خزمه‌تكرنا ئاوه‌ریێن شنگال چه‌ندین ساڵه باره‌ك ل سه‌ر ئه‌رگێ حكومه‌تا هه‌رێما كوردستانێ یه"
ل پارێزگه‌ها دهۆكێ 26 هزار خێزانێن ئاواران دناڤ كه‌مپان دانه و 37 خێزانێن ئاواران ژى ژده‌رڤه‌ى كه‌مپان دژین, هه‌روه‌سا ژ6 هه‌تا 7 هزار خێزان ژى ل ده‌ڤه‌رێن مادا 140 ماینه.
مه‌حما خه‌لیل ل دویماهیێ دبێژیت "داخوازییا مه ژحكومه‌تا عیراقێ ئه‌وه كو رێككه‌فتنا شنكالێ بهێته جێبه‌جێكرن و قه‌ره‌بویا خه‌لكێ شنگالێ بهێته كرن و ئاڤاكرنا شنگالێ یه, دیسان داخوازییامه ژئاوارێن مه و خه‌لكێ شنگالێ ئه‌وه بچن سه‌ر سندوقێن ده‌نگدانێ و ده‌نگێ خۆ ب لیستا 197 بده‌ن چونگه ب تنێ حكومه‌تا هه‌رێما كوردستانێ و پارتى دیموكرتى كوردستان خۆ ل كه‌یسێن ئاواره‌یان و كار و بارێن وان كرییه خودان".
سه‌جا شێرزاد-دهۆك
