ب تنێ ل پارێزگه‌ها دهۆكێ دئه‌ڤ ساڵه‌ دا نێزیك 15 ڤیسته‌ڤاڵێن جورا و جور هاتینه‌ ڤه‌كرن

كابینه‌یا نه‌هێ یا حكومه‌تا هه‌رێما كوردستانێ ل پال سێكته‌رێن خزمه‌ت گوزارى گرنگییه‌كا تایبه‌ت داییه‌ سیكته‌رێ ره‌وشه‌نبیرى و هونه‌رى و كه‌لتورى, و ئه‌ڤ چه‌نده‌ ل به‌رچاڤ دهێته‌ دیتن ب ڤه‌كرنا ڤیسته‌ڤاڵێن جورا و جور یێن به‌رهه‌مێن خومالى, و ب هندێ ده‌رگه‌هه‌كێ ئابورى یێ نوى ژبۆ هه‌رێما كوردستانێ هاتییه‌ ڤه‌كرن.

دئه‌ڤ ساڵه‌دا ل پارێزگه‌ها دهۆكێ ب گشتى و هه‌ر ژ1ى هه‌یڤا 1 ساڵا 2023ێ و هه‌تا 1ى هه‌یڤا 12 ساڵا 2023ێ,  5 ڤیسته‌ڤاڵێن به‌رهه‌مێن خومالى یێن جورا و جور هاتنه‌ دانان و تێدا ده‌هان ته‌نێن به‌رهه‌مێن خومالى یێن جوتیاران هاتنه‌ فروتن و ب هزاره‌هان خه‌لكێ بیانى و ناڤخوى سه‌ره‌دان لێ كرینه‌, هه‌روه‌سا نێزیك 10 ڤیسته‌ڤال و كه‌رنه‌ڤالێن ره‌وشه‌نبیرى و هونه‌رى و كولتورى هاتنه‌ ڤه‌كرن تێدا ژى ب هزاره‌هان خه‌لكێ بیانى و ناڤخوى سه‌ره‌دان لێ كرینه‌ و مفا و خوشى ژێ وه‌رگرتینه‌.

ئه‌حمه‌د جه‌میل, رێڤه‌به‌رێ چاندنا پارێزگه‌ها دهۆكێ تایبه‌ت بۆ مالپه‌رێ فه‌رمى یێ پارتى دیموكراتى كوردستان به‌حس ل گرنگییا پێنگاڤا ڤه‌كرنا ڤیسته‌ڤاڵێن به‌رهه‌مێن خومالى یێن چاندنێ دكه‌ت تایبه‌ت ل سه‌ر كه‌رتێ چاندنێ:

"ڤه‌كرنا پێشانگه‌ه و ڤیسته‌ڤالێن به‌رهه‌مێ خومالى یێ چاندنێ كارتێكرنه‌كا ئه‌رێنى ژچه‌ند لایه‌نان ڤه‌ ل كه‌رتێ چاندنێ كرییه‌, ئه‌وژى پێشاندانا به‌رهه‌مێن جوتیارێن مه‌نه‌ بۆ خه‌لكێ پارێزگه‌هێن دى یێن هه‌رێما گوردستانێ هه‌روه‌سا خه‌لكێ بیانى, دیسان راكێشانا كه‌رتێ تایبه‌ته‌ بۆ كه‌رتێ چاندنێ ژبۆ ڤه‌كرنا پرۆژه‌یێن مه‌زن ل هه‌رێما كوردستانێ دگه‌ل جوتیارێن مه‌, هه‌روه‌سا په‌یداكرنا بازارگێریێ ژبۆ به‌رهه‌مێن مه‌ یێن خومالى."

ژوان 5 ڤیسته‌ڤاڵین ل پارێزگه‌ها دهۆكێ یێن به‌رهه‌مێ خومالى هاتینه‌ دانان, ڤیسته‌ڤاڵا هنار و هنگڤینى بوو ل ئیدارا سه‌ربه‌خۆ یا زاخۆ, دیسان ڤیسته‌ڤاڵا ترى و هنگڤینى بوو ل سه‌نته‌رێ پارێزگه‌ها دهۆكێ, و ڤیسته‌ڤاڵا به‌رهه‌مێن خومالى بوو ل قه‌زا ئاكرێ, و ڤیسته‌ڤاڵا ته‌حینێ بوو ل قه‌زا ئامێدیێ هه‌روه‌سا ڤیسته‌ڤاڵا سیڤا به‌روارییان بوو ل ده‌ڤه‌را به‌روارى باڵا-قه‌زا ئامێدیێ.

د.خیری عەلی ئوسو، رێڤەبەرێ رێڤه‌به‌رییا گشتى یا گه‌شت و گوزارێ ل پارێزگه‌ها دهۆكێ تایبه‌ت بۆ مالپه‌رێ فه‌رمى یێ پارتى دیموكراتى كوردستان, به‌حس ل گرنگییا ڤه‌كرنا ڤان جوره‌ ڤیسته‌ڤاڵان كر ل سه‌ر كه‌رتێ گه‌شتیارى و گوت: "هه‌ر ڤیسته‌ڤاڵه‌ك ل پارێزگه‌ها دهۆكێ دهێته‌ ڤه‌كرن رێكلامه‌كا هه‌ره‌ باش ژلایێ لایه‌نێن په‌یوه‌ندیدار بۆ دهێته‌ كرن و ئه‌ڤ چه‌نده‌ دبیته‌ جهێ سه‌رنجا ژماره‌یه‌كا زور یا گه‌شتیاران و ب هندێ ئه‌و گه‌شتیار ژى سه‌ره‌دانا پارێزگه‌ها دهۆكێ دكه‌ن و ب ره‌نگه‌كێ جودا ل سه‌ر كولتور و به‌رهه‌مێن مه‌ ئاشنا دبن و بزاڤا كرینا وان كه‌ل و په‌لان دكه‌ن یێن هاتین نیشاندان, تایبه‌ت كو به‌شه‌ك ژوان گه‌شتیارێن سه‌ره‌دانێ دكه‌ن بازرگان و وه‌به‌رهێنه‌رن و ئه‌ڤه‌ ژى دبیته‌ ده‌رگه‌هه‌ك ژبۆ ئه‌نجامدانا كارێن هه‌ڤپشك یێن بازرگانى و ئابورى دخزمه‌تا كه‌رتێ گه‌شتیارى و ئابورى دا"

ب گور وان ئامارێن رێڤه‌به‌رییا گشتى یا چاندنا پارێزگه‌ها دهۆكێ بۆ مالپه‌رێ مه‌ دیاركرین, ل ڤیسته‌ڤاڵا ترى و هنگڤینى یا سه‌نته‌رێ پارێزگه‌ها دهۆكێ نێزیك 4 ته‌نێن به‌رهه‌مێ نمایشكرى هاته‌ فروتن ل ده‌مه‌كێ پترى 1 هزار كه‌سان سه‌ره‌دانا ڤیسته‌ڤاڵێ كربوون, دیسان ب گور وان ئامارێن رێڤه‌به‌رییا گشتى یا چاندنا ئیدارا سه‌ربه‌خۆ یا زاخۆ بۆ مالپه‌رى دیاركرین ل ڤیسته‌ڤاڵا هنار و ترى نێزیك 9 ته‌نێن به‌رهه‌مێن نمایشكرى هاتنه‌ فروتن ل ده‌مه‌كێ نێزیك 10 هزار كه‌سان سه‌ره‌دانا ڤیسته‌ڤالێ كربوون, و ب گور ئامارێن رێڤه‌به‌رییا چاندنا قه‌زا ئاكرێ بۆ مالپه‌رى دیاركرن ل ڤیسته‌ڤاڵا به‌رهه‌مێن خومالى نێزیك 10 ته‌نێن به‌رهه‌مێن نمایشكرى هاتنه‌ فروتن ل ده‌مه‌كێ نێزیك 10 هزار كه‌سان سه‌ره‌دانا ڤیسته‌ڤاڵێ كربوون, هه‌روه‌سا ب گور ئامارێن رێڤه‌به‌رییا چاندنا قه‌زا ئامێدیێ بۆ مالپه‌رى دیاركرین ل ڤیسته‌ڤالا ته‌حینێ پترى 25 ته‌نێن به‌رهه‌مێ نمایشكرى هاتنه‌ فروتن ل ده‌مه‌كێ پترى 20 هزار كه‌سان سه‌ره‌دان كربوون و ل ڤیسته‌ڤاڵا سێڤا به‌روارییان پترى 21 ته‌نێن به‌رهه‌مێ نمایشكرى هاتنه‌ فروتن ل ده‌مه‌كێ پترى 20 هزار كه‌سان سه‌ره‌دان كربوون.

ل ده‌مێ به‌حس ل به‌رهه‌مێ خومالى دكه‌ین مه‌ره‌م ب تنێ به‌رهه‌مێن چاندنێ نینه‌, به‌لكو به‌رهه‌مێن هزرى و ره‌وشه‌نبیرى و هونه‌رى ژى نه‌, وه‌كو فلمه‌ ڤیسته‌ڤالا دهۆكێ یا نیڤده‌وله‌تى و ڤیسته‌ڤاڵا دومان(قه‌ره‌چان) و ڤیسته‌ڤاڵا پارێزگه‌هبوونا دهۆكێ و ڤیسته‌ڤاڵا سه‌رێ ساڵى و ڤیسته‌ڤاڵا ئاگرێ نه‌وروزێ و گه‌له‌ك ژڤیسته‌ڤاڵێن دى, كو تێدا خه‌لك ژوه‌ڵات و باژێرێن جودا قه‌ست دكه‌نێ ژبۆ دیتنا وان به‌رهه‌مان.

حه‌سه‌ن فه‌تاح, په‌یڤدارێ رێڤه‌به‌رییا گشتى یا ره‌وشه‌نبیرى و هونه‌رى یا پارێزگه‌ها دهۆكێ, تایبه‌ت بۆ مالپه‌رى: "ره‌نگڤه‌دانا ڤه‌كرنا ڤیسته‌ڤالان ل دهۆكێ ئه‌گه‌ره‌كێ گرنگه‌ ژبۆ ڤه‌لڤینا ئابورى یا پارێزگه‌ها دهۆكێ, چونكه‌ ب ڤیسته‌ڤاڵ و كه‌رنه‌ڤاڵان كولتور و شارستانیه‌تا خۆ نیشا جیهانا ژده‌رڤه‌ دده‌ین, چ ب هاتنا مێهڤانێن بیانى یان ژى رومالكرن ب چافكێن كامیرێن میدیایی تایبه‌ت كو ل ڤى سه‌رده‌مێ ته‌كنولوجیایێ شه‌رێ سه‌فاندنا كولتورایه‌ و ئه‌و ملله‌تێن بزاڤێن هونه‌رى و ڤیسته‌ڤاڵ و كه‌رنه‌ڤاڵ هه‌بن ده‌وله‌مه‌ندییا كولتورى و شارستانیه‌تا وه‌لاتى خۆ دسه‌لمینن"

كاوه‌ عه‌بدولعه‌زیز ماموستایێ زانكویێ و ئابورناس رایا خۆ سه‌باره‌ت كارتێكرنا ڤه‌كرنا ڤیسته‌ڤاڵان ل سه‌ر ئابورێ هه‌رێما كوردستانێ بۆ مالپه‌رێ فه‌رمى یێ پارتى دیموكراتى كوردستان دیاردكەت و دبێژیت: "ڤه‌كرنا ڤیسته‌ڤاڵین جورا و جور یێن پیشه‌كارێن هه‌رێما كوردستانێ ل ده‌مێن جودا كاریگه‌ره‌یه‌كا زور هه‌یه‌ ل سه‌ر ئابورێ هه‌رێما كوردستانێ ب گشتى چونكه‌ ده‌رگه‌هه‌كێ ب هێزه‌ ژبۆ فروتنا راسته‌وخو, دیسان په‌یوه‌ندیێن بهێز و دووم درێژ دناڤ به‌را بازرگان و وه‌به‌رهێنه‌ران دگه‌ل پیشه‌كار و به‌رهه‌مهێنه‌رێن مه‌ دهێنه‌ گرێدان بۆ هندێ كارێن نوى و مه‌زن ل سه‌ر ئاستێ هه‌رێما كوردستانێ و كه‌رتێ تایبه‌ت بهێنه‌ كرن, هه‌روه‌سا ب به‌رده‌وام بوونا ڤه‌كرنا ڤان ڤیسته‌ڤاڵان خه‌لكێ مه‌ دێ بزاڤا به‌رهه‌م ئینانێ كه‌ت هه‌روه‌سا به‌رهه‌مهێنه‌رێن مه‌ ژى دێ بزاڤا باشتركرنا به‌رهه‌مێن خۆ كه‌ن و ب ڤى ره‌نگى بزاڤا بازرگانییا نیڤده‌وله‌تى دێ خورت تر لێ هێت و هوسا دێ ده‌رگه‌هه‌كێ مه‌زن ژبۆ ئابورێ هه‌رێما كوردستانێ دگه‌ل وه‌ڵاتێن جیهانى ڤه‌كه‌ت.

و گوت ژى: ڤه‌كرنا ڤیسته‌ڤاڵان ل جهێن جودا یێن هه‌رێما كوردستانێ و پارێزگه‌ها دهۆكێ تایبه‌تمه‌ندیێ دده‌ته‌ باژێر و پارێزگه‌هێن مه‌, كو هه‌ر ئێكێ مورا خۆ یا تایبه‌ت هه‌بیت دجیهانا به‌رهه‌مئینانێ دا و ئه‌ڤه‌ ژى وێ چه‌ندێ دسه‌لمینیت كو هه‌رێما كوردستانێ وه‌لاته‌كێ ب خێر و بێره‌ و ئه‌م ژى پشتبه‌ستنێ ب تنێ ل سه‌ر ده‌رگه‌هه‌كێ داهاتى نه‌كه‌ین به‌لكو مه‌ ده‌هان ده‌رگه‌هێن دى ژى هه‌بن"

سه‌جا شێرزاد-دهۆك